Алматыда өрт сөндірушілер Райымбек пен Розыбакиев көшелерінің қиылысындағы көтерме сауда аймағындағы қоймалардағы өртті сөндірді. Өрт аумағы 1000 шаршы метрден асады, деп хабарлайды «Адырна» ұлттық порталы Қалалық төтенше жағдайлар департаментінің баспасөз қызметіне сілтеме жасап.
Дүйсенбі, 18 желтоқсан күні таңертең 101 нөміріне қоймадағы өрт туралы хабарлама келіп түскен.
«Өрт нысан қызметкерінің өрт туралы кеш хабарлауы нәтижесінде пайда болды, біз оқиға орнына жедел штабты орналастырдық, мүдделі қалалық қызметтерді жұмылдырдық, үш жауынгерлік аймақ құрдық. Өртті сөндіруге және көрші қоймаларды қорғауға өрт оқпандары енгізілді. Райымбек даңғылынан тасымалдау арқылы үздіксіз су беру қамтамасыз етілді», - деді ТЖД бастығының орынбасары полковник Әйтеев Асан.
Өртті сөндіруді қоймалардың жоғары өрт жүктемесі қиындатқан, бұл өрттің тез таралуына, жоғары температура мен қою түтінге ықпал етті. Өрт сөндірушілер өрттің жақын маңдағы тауарлар мен материалдар (картон, қағаз өнімдері, азық-түлік өнімдері) бар қоймаларға таралуының алдын алып, сол арқылы кәсіпкерлер мүлкінің едәуір бөлігін қорғауға мүмкіндік тудырды. Өрт 08:50-де оқшауланып, 09:45-те сөндірілді. Құрбандар мен зардап шеккендер жоқ. Іске 30-дан астам техника мен 100 адам жұмылдырылды.
Кәсіпкерлер өрт сөндірушілерге алғыстарын білдірді. Өрт сөндірушілерге алғыс білдіргендердің бірі – «Хамле» филиалының басшысы Андрей Орлов.
«Адырна» ұлттық порталы
