30 сәуір күні Ресей тарапының өтінішімен Тәжікстан сыртқы істер министрі Сирожиддин Мухриддин ресейлік әріптесі Сергей Лавровпен телефон арқылы сөйлесіп, Мәскеудегі Тәжікстан азаматтарын тексеру жайын талқылады, деп хабарлайды “Адырна” ұлттық порталы Тәжікстан сыртқы істер министрлігіне сілтеп.
Мәліметке қарағанда, сыртқы істер ведомстволарының басшылары Ресей билігінің қатаң шаралары нәтижесінде Ресей аумағында орналасқан Тәжікстан азаматтарының қиын жағдайға тап болғанын талқылады.
Ресей сыртқы істер министрі Сергей Лавров бұл мәселеге байланысты тәжік тарапының реакциясын түсінетінін айтты.
Министр Мухриддин Тәжікстан азаматтарына мұндай теріс көзқарас пен олардың құқықтары мен бостандықтарының жаппай бұзылуы екіжақты қарым-қатынас қағидаттарына сәйкес келмейтінін баса айтты. Осы тұрғыда әңгімелесушінің назары ресейлік тараптың негізгі екіжақты және көпжақты құқықтық актілердің, атап айтқанда Тәжікстан Республикасы мен Ресей Федерациясы арасындағы Достық, ынтымақтастық және өзара көмек туралы шарттың ережелерін сақтау қажеттілігіне аударылды.
Лавровтың «қабылданған шаралар белгілі бір ұлтқа немесе дінге қарсы емес» деген мәлімдемесі аясында Мухриддин бұл тезис нақты жағдаймен үйлеспейтінін және келеңсіз әрекеттер тек Тәжікстан азаматтарына қатысты екенін атап өтті.
Әңгімелесушілер тараптардың стратегиялық серіктестік пен одақтастық қағидаттарына адалдығын сақтау қажеттігі туралы бірауыздан пікір білдірді.
Осы мәліметті Ресей жағы былай хабарлады. Ресей сыртқы істер министрлігінің хабарлауынша, «Тәжікстан тарапына Ресей Федерациясының заңнамасына сәйкес лаңкестіктің алдын алу бойынша ресейлік қызметтердің қабылдап жатқан шаралары туралы қосымша толық түсіндірмелер берілген».
Лавров Ресейге келген шетел азаматтарын мұқият тексерудің басты себебі 22 наурызда Мәскеу түбіндегі Crocus City Hall концерт залында болған теракт ісі екенін атап өтті. Министр қабылданып жатқан шаралардың уақытша екеніне ерекше тоқталып, олардың белгілі бір ұлтқа немесе дінге қарсы еместігін айтты. Бақылау бекеттеріндегі жағдай біртіндеп қалыпқа келуде.
«Тараптар Ресей-Тәжікстан арасындағы түсініспеушіліктен кейін стратегиялық серіктестік пен одақтастық қарым-қатынастарын сыйлау, олардың оң динамикасын сақтау және нығайту қажеттілігі туралы бірауыздан пікір білдірді», - деп хабарлады Ресей сыртқы істер министрлігі.
Тәжікстан сыртқы істер министрлігінің хабарлауынша, соңғы уақытта жүздеген тәжік азаматы бақылау-өткізу бекеттері мен Мәскеу әуежайларында тұрып қалып, Ресей аумағына кіргізілмей жатыр. Олардың кейбірі бірнеше сағат күткеннен кейін өтіп кетіп жатса, ал басқалары жер аударып кетуде.
Еске сала кетейік, бұған дейін Тәжікстанның сыртқы істер министрлігі Ресейдің республикадағы елшісін шақыртып, Ресей аумағында Тәжікстан азаматтарының құқықтарының бұзылуына байланысты наразылық нотасы табыс етілгенін жазған болатынбыз.
