“ورمەك” وپەراتسياسى. ناتو رەسەيدىڭ اۆياتسياسىنا كەلتىرىلگەن شىعىندى راستادى

ۋكراينا قاۋىپسىزدىك قىزمەتى رەسەي اۋماعىنداعى بىرنەشە اسكەري اەرودرومدارعا دروندار ارقىلى اۋقىمدى شابۋىل جاسادى، دەپ حابارلايدى “ادىرنا” ۇلتتىق پورتالى DW-عا سىلتەپ. ناتو-نىڭ مالىمەتىنە سايكەس، بۇل – ۋكراينا تاراپى جۇزەگە اسىرعان ەڭ ءىرى اسكەري وپەراتسيالاردىڭ ءبىرى بولدى. بريۋسسەلدە وتكەن بريفينگتە ناتو-نىڭ جوعارى لاۋازىمدى وكىلى بۇل وپەراتسيا بارىسىندا رەسەيدىڭ ستراتەگيالىق ماڭىزى بار 40-تان استام ۇشاعى زاقىمدانىپ، ولاردىڭ 10-13 بىرلىگى تولىعىمەن جويىلعانىن ايتتى. اتاپ ايتقاندا، تۋ-95 (15 دانا), تۋ-22م3 (12 دانا) جانە سيرەك قولدانىلاتىن ا-50 ۇشاقتارىنىڭ ءبىرى زاقىمدانعان. ناتو دەرەكتەرىنشە، جاسالعان شابۋىل رەسەيدىڭ 34% ستراتەگيالىق بومبالاۋشى كۇشىن ىستەن شىعارعان. بۇل ۇشاقتار ۋكراينا اۋماعىنا 3000-نان استام قاناتتى زىمىران ۇشىرعان. ال ولاردىڭ نەگىزگى نىساناسى – بەيبىت تۇرعىندار مەن ازاماتتىق ينفراقۇرىلىم بولعان. ناتو باس حاتشىسى مارك ريۋتتە بۇل وپەراتسيانى ەگجەي-تەگجەيلى تالقىلاۋدان باس تارتقانىمەن، ۋكراينا زاڭدى اسكەري نىساندارعا سوققى بەرگەنىن اتاپ ءوتتى. ال ساراپشىلار «ورمەك» وپەراتسياسىن رەسەيدىڭ ستراتەگيالىق اۆياتسياسىنا قارسى جاسالعان تاريحتاعى ەڭ ءىرى سوققى دەپ باعالاۋدا. ۋكراينا قاۋىپسىزدىك قىزمەتىنىڭ مالىمەتىنشە، شابۋىل ناتيجەسىندە رەسەيگە كەلتىرىلگەن ماتەريالدىق شىعىن 7 ملرد دوللاردى قۇرايدى. OSINT تالداۋشىلارى سپۋتنيكتىك دەرەكتەر مەن ۆيدەوجازبالارعا سۇيەنە وتىرىپ، كەمىندە 13 ۇشاقتىڭ ناقتى زاقىمدانعانىن راستادى. رەسەي قورعانىس مينيسترلىگى شابۋىل فاكتىسىن مويىندادى. الايدا ناقتى شىعىن كولەمى كورسەتىلمەدى.