Кремльдің жаңа ядролық компоненттері бар ғарыштық қару түрін жасау бағдарламасымен байланыстырылатын Ресейдің құпия «Космос-2553» спутнигі істен шығуы мүмкін, деп хабарлайды "Адырна" ұлттық порталы.
Бұл туралы Reuters агенттігі аналитикалық деректерге сілтеме жасап жазды.
Ресей «Космос-2553» спутнигін 2022 жылғы ақпандағы Украинадағы соғыс басталардан аз уақыт бұрын орбитаға шығарған болатын. АҚШ билігі бұл спутниктің Ресейдің ғарышқа америкалық спутниктерді жоюға қабілетті ядролық қару орналастыру жоспарларымен байланысты екенін мәлімдеген. Кремль бұл айыптауларды жоққа шығарып отыр.
«Космос-2553» спутнигінің ерекше қимылдары 2024 жылдың қараша айында LeoLabs компаниясының радиолокациялық бақылауы арқылы тіркелген.
Желтоқсан айында жүргізілген қосымша бақылаулар спутниктің «бақылаусыз айналып жүргенін» жоғары сенімділікпен растауға мүмкіндік берді.
