ەسىل – ارقالىق ۋچاسكەسىنىڭ تەمىرجول وتكەلىندە تراكتور پويىزبەن سوقتىعىسىپ، جۇرگىزۋشى قازا تاپتى، دەپ حابارلايدى "ادىرنا" ۇلتتىق پورتالى.
بۇل تۋرالى «قازاقستان تەمىر جولى» ۇلتتىق كومپانياسىنىڭ ءباسپاسوز قىزمەتى حابارلادى.
«2025 جىلعى 27 ساۋىردە ساعات 08:55-تە ەسىل – ارقالىق ۋچاسكەسىندەگى رەتتەلەتىن تەمىرجول وتكەلىندە جول-كولىك وقيعاسى ورىن الدى. وتپەلى سيگناليزاتسيانىڭ دۇرىس جۇمىس ىستەپ تۇرعانىنا قاراماستان، تراكتور جۇرگىزۋشىسى جول ءجۇرۋ ەرەجەسىن ورەسكەل بۇزىپ، كەلە جاتقان پويىزدىڭ الدىنا شىعىپ كەتكەن. ماشينيست شۇعىل تەجەۋ قولدانعانىمەن، سوقتىعىسپاۋ مۇمكىن بولماعان. وقيعا سالدارىنان تراكتور جۇرگىزۋشىسى العان اۋىر جاراقاتىنان قايتىس بولدى»، – دەلىنگەن جەكسەنبى كۇنى تاراتىلعان حابارلامادا.
«قازاقستان تەمىر جولى» كومپانياسى اۆتوكولىك جۇرگىزۋشىلەرىنە تەمىرجول وتكەلدەرىنەن وتكەن كەزدە جول ءجۇرۋ ەرەجەلەرىن قاتاڭ ساقتاۋعا، وتكەلدەگى سيگناليزاتسيا بەلگىلەرىنە مۇقيات نازار اۋدارۋعا جانە ەرەجەلەردى ەلەمەۋدىڭ اۋىر زارداپتارعا اكەلۋى مۇمكىن ەكەنىن ۇمىتپاۋعا شاقىردى.
