71 ملن تەڭگە جىمقىرعان. شىمكەنتتە مەكتەپ ديرەكتورى سوتتالدى

1197
Adyrna.kz Telegram
https://adyrna.kz/content/uploads/2020/01/sot-960x500.jpg?token=13e59c644cadaa2b1d57e4501bb6a2b7
شىمكەنتتە ورتا مەكتەپ ديرەكتورى مەن باس بۋحگالتەرى 8 جىلعا سوتتالدى. بۇل تۋرالى قالالىق سوت مالىمدەدى، دەپ حابارلايدى “ادىرنا” ۇلتتىق پورتالى.  مالىمەت بويىنشا ولار ءوزارا ءسوز بايلاسىپ، ءىرى كولەمدە بيۋدجەت قاراجاتىن جىمقىرعان، سونداي-اق مۇعالىمنەن پارا العان. "ديرەكتور مەن باس بۋحگالتەر الدىن الا ءسوز بايلاسىپ، 2022 جىلدىڭ اقپانىنان 2024 جىلدىڭ تامىزىنا دەيىن اسا ءىرى مولشەردە ماتەريالدىق پايدا الۋ ماقساتىندا مۇعالىمدەردىڭ جالاقىسىن ەسەپتەۋ كەزىندە ولارعا ارتىق اقشا اۋدارعان. بۋحگالتەر بۇل قاراجاتتى ءوزىنىڭ شوتتارىنا، سونداي-اق جاقىن تۋىستارىنا اۋدارىپ، كەيىن قولما-قول اقشاعا ايىرباستاعان ", - دەپ جازىلعان حابارلامادا. مەملەكەتكە كەلتىرىلگەن جالپى شىعىن 71 ملن تەڭگەدەن استى. "سونىمەن قاتار 2022 جىلى ديرەكتور ءوزىنىڭ وقۋ ءبولىمى بويىنشا ورىنباسارى ارقىلى مۇعالىمنىڭ دەكرەتتىك دەمالىستان مەرزىمىنەن بۇرىن شىققانى ءۇشىن 150 مىڭ تەڭگە كولەمىندە پارا العان", - دەيدى قالالىق سوت. سوت ۇكىمىمەن مەكتەپ ديرەكتورى مەن باس بۋحگالتەردىڭ ارقايسىسى 8 جىلعا باس بوستاندىعىنان ايىرىلدى. سونداي-اق ولار مەملەكەتتىك قىزمەتتە جانە مەملەكەتتىك مەكەمەلەردە قىزمەت ەتۋ قۇقىعىنان ءومىر بويىنا ايىرىلدى.
پىكىرلەر