Қырғызстандық кәсіпкер әйел Рысгүл Әкімжанова әлемдегі ең биік тау – Эверест шыңын бағындырды. Бұл туралы Facebook парақшасында оның күйеуі, парламент депутаты Эмиль Токтошев жазды, деп хабарлайды “Адырна”.
Оның айтуынша, Рысгүл шыңға 27 мамыр күні Непал уақытымен таңғы 04:40-та көтерілген. «Қазір ол базалық лагерьге түсіп келе жатыр. Оған сәтті түрде төмен түсуін тілейміз», – деп жазды Токтошев.
Рысгүл Эверестті екінші әрекетінде бағындырды. Бұған дейін ол 8400 метр биіктікте оттегінің жетіспеуіне байланысты көтерілуін тоқтатуға мәжбүр болғанын жазған.
Ол – Эверестті бағындырған Қырғызстаннан шыққан екінші әйел. Бұған дейін, 9 мамыр күні, Әсел Байбагышева Эвересттің шыңына Қырғызстан туын тіккен болатын.
Эвересттің биіктігі – 8 848 метр. Әкімжанова осы шыңды бағындырған Қырғызстаннан шыққан алтыншы альпинист атанды.
