ەل تاۋەلسىزدىگىنىڭ 30 جىلدىعى قارساڭىندا «اسار» شاعىناۋدانىندا فيزيكا-ماتەماتيكا باعىتىندا تەرەڭدەتىپ ءبىلىم بەرەتىن «Intellect» ليتسەيىنىڭ سالتاناتتى اشىلۋ ءراسىمى ءوتتى. وعان شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان، قالالىق ءبىلىم باسقارماسىنىڭ باسشىسى جانات تاجيەۆا جانە بىرىككەن اراب امىرلىكتەرىنىڭ «Ummet» قوعامدىق قورىنىڭ وكىلى ساليح الي ابدراحمان بۋحاليد قاتىستى.
—تاۋەلسىزدىكتىڭ العاشقى جىلدارىندا شىمكەنت قالاسىندا 70 مەكتەپ بولسا، بۇگىندە ءبىلىم ۇيالارىنىڭ سانى 200-گە جۋىقتادى. وندا 250 مىڭعا تارتا وقۋشى ءبىلىم الۋدا. سوڭعى جىلدارى ءبىلىم سالاسىنا ينۆەستورلار تارتىلىپ، جان باسىنا قارجىلاندىرۋ جۇيەسى بويىنشا جۇمىس ىستەيتىن جەكەمەنشىك مەكتەپتەر كوپتەپ سالىنۋدا. بۇگىن سونداي ءبىلىم ۇيالارىنىڭ تاعى بىرەۋى — «Intellect» فيزيكا-ماتەماتيكا ليتسەيىنىڭ اشىلۋىنا كەلىپ وتىرمىز. وسىنىڭ بارلىعى جاس ۇرپاقتىڭ ءبىلىمدى بولۋىنا مەملەكەتتىڭ ايرىقشا نازار اۋدارىپ وتىرعانىن كورسەتەدى، — دەدى شىڭعىس جۇمابەكۇلى.
جيىن بارىسىندا «Ummet» قورىنىڭ وكىلدەرى وقۋشىلارعا مەكتەپ فورمالارىن سىيعا تارتتى.
ايتا كەتەيىك، زاماناۋي ۇلگىدە بوي كوتەرگەن مەكتەپتە وقۋشىلارعا فيزيكا-ماتەماتيكا باعىتىندا تەرەڭدەتىلگەن ءبىلىم بەرىلەدى. سونداي- اق، ءبىلىم الۋشىلارعا جالپى پاندەر بويىنشا قوسىمشا ساباقتار جۇرگىزىلىپ، شاحمات، دومبىرا، تىگىن ۇيىرمەلەرى دە جۇمىس ىستەيدى. جالپى، ليتسەي 600 وقۋشىعا ارنالعان. ازىرگە مۇندا 275 وقۋشى ءبىلىم الۋدا.
