شىمكەنت قالاسىندا تۇرعىن ۇيگە مۇقتاج ازاماتتاردى باسپانامەن قامتاماسىز ەتۋ باعىتىنداعى جۇمىستار جۇيەلى تۇردە جۇرگىزىلىپ كەلەدى. بۇگىندە تۇرعىن ءۇي الۋ تىزىمىندە تىركەلگەن ازاماتتاردىڭ جالپى سانى 53 297 ادامدى قۇرايدى. ولاردىڭ 1 754-ءىن جەتىم جانە اتا-اناسىنىڭ قامقورلىعىنسىز قالعان بالالار، 16 503-ءىن كوپبالالى وتباسىلار، 18 579-ىن حالىقتىڭ الەۋمەتتىك جاعىنان وسال توبى، 16 438-ءىن مەملەكەتتىك قىزمەتشىلەر، بيۋدجەتتىك ۇيىم جانە اسكەري قىزمەتشىلەر، 23-ءىن جالعىز تۇرعىن ءۇيى اپاتتى جاعدايدا دەپ تانىلعان ازاماتتار قۇراپ وتىر. بۇل دەرەكتەر بىزگە قالاداعى باسپانا ماسەلەسىنىڭ قانشالىقتى وزەكتى ەكەنىن كورسەتەدى.
وتكەن جىلى تۇرعىن ءۇي كەزەگىندە تۇرعان 1 000 ازاماتقا ارەندالىق پاتەر بەرۋ جوسپارلانعان بولاتىن. ونىڭ 803-ءى ءوز يەلەرىنە تابىستالىپ، قالعان پاتەرلەر بيىل پايدالانۋعا بەرىلەدى دەپ كۇتىلۋدە.
2019 جىلدان بەرى ەلىمىزدە استانا، الماتى جانە شىمكەنت قالالارىندا جۇمىس ىستەيتىن جاستارعا ارنالعان «ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى ىسكە اسىرىلىپ كەلەدى. اتالمىش باعدارلاما جاستاردىڭ ءوز بەتىمەن ءومىر باستاۋىنا، ەڭبەك ەتۋىنە جانە الەۋمەتتىك جاعدايىنىڭ جاقسارۋىنا دا ۇلكەن قولداۋ كورسەتىپ وتىر.
شىمكەنت قالاسى بويىنشا وسى ۋاقىتقا دەيىن 3 849 جاس وتباسى 5 جىل مەرزىمگە تۇرعىن ۇيمەن قامتاماسىز ەتىلدى.
ودان بولەك، 2024 جىلى مەملەكەتتىك تۇرعىن ءۇي باعدارلامالارىنىڭ «2-10-20» جانە «5-10-20» باعىتتارى بويىنشا جەڭىلدەتىلگەن نەسيەلىك نەگىزدە 1 577 پاتەر يەلەرىنە تاپسىرىلدى. بۇل جوبالار ازاماتتارعا تومەن پايىزبەن، ۇزاق مەرزىمگە نەسيە الىپ، باسپاناعا قول جەتكىزۋگە مۇمكىندىك بەرەدى. اسىرەسە، تابىسى ورتاشا دەڭگەيدەگى ازاماتتار ءۇشىن مۇنىڭ ءتيىمدى ءارى قولجەتىمدى ەكەنىن ايتا كەتۋ كەرەك.
بۇيىرتسا، بيىل قالالىق قۇرىلىس باسقارماسى تاراپىنان 3 592 پاتەرلى 57 تۇرعىن ءۇيدىڭ قۇرىلىسى جۇرگىزىلمەك. بۇل كورسەتكىش – شىمكەنت قالاسىنىڭ الەۋمەتتىك-ەكونوميكالىق دامۋ قارقىنى مەن تۇرعىنداردى تۇرعىن ۇيمەن قامتۋ ستراتەگياسىنىڭ ناقتى جۇزەگە اسىپ جاتقانىن كورسەتەدى.
قورىتا ايتقاندا، مەملەكەتتىك باعدارلامالار اياسىندا جۇزەگە اسىپ جاتقان جوبالار – قالا حالقىنىڭ تۇرمىسىن جاقسارتۋعا جاسالعان ماڭىزدى قادامدار. شىمكەنت قالاسىندا تۇرعىن ۇيمەن قامتۋ ماسەلەسىنىڭ كەزەڭ-كەزەڭىمەن شەشىلۋى – تۇرعىنداردىڭ ءال-اۋقاتىن ارتتىرىپ قانا قويمايدى. سونىمەن قاتار، قالا ينفراقۇرىلىمىنىڭ دا تۇراقتى دامۋىنا جول اشاتىنى ءسوزسىز.
ۇقساس جاڭالىقتار
