الەۋمەتتىك جەلىدە مەكتەپ جاسىنداعى كىشكەنتاي ەكى بالانىڭ دەنە جاراقاتىن العان ۆيدەوسى تارادى. ۆيدەودا بالالاردى مەدرەسەدە حاديستەردى جاتتاماعانى ءۇشىن ۇرعاندىعى ايتىلادى. قازاقستان مۇسىلماندارى ءدىني باسقارماسى وقيعانىڭ انىق-قانىعىنا كوز جەتكىزدى. بۇل تۋرالى قازاقستان مۇسىلماندار ءدىني باسقارماسىنىڭ ءباسپاسوز حاتشىسى ايتتى، دەپ حابارلايدى “ادىرنا” ۇلتتىق پورتالى.
وقيعا شىمكەنت قالاسىندا بولعان. تۇركىستان وبلىسى سارىاعاش اۋدانىنىڭ تۇرعىندارى اعالى-ءىنىلى باۋىرلاردى «تاسپاۋ ءسالىمباي» مەشىتىنىڭ ۇستازى رۇستەم اسقاروۆقا ءۇي جاعدايىندا ءدىني ساباق بەرۋدى وتىنەدى.
وكىنىشكە قاراي، «تاسپاۋ ءسالىمباي» مەشىتىنىڭ ۇستازى رۇستەم اسقاروۆ وزگە تۇرمىستىق ماسەلەلەر بويىنشا اشۋلانىپ، ءوز ەموتسياسىن تىزگىندەي الماي، كامەلەتكە تولماعان بالالارعا قول جۇمساعان.
بىرىنشىدەن، بۇل وقيعا مەدرەسەدە بولماعان. ەكىنشىدەن، «قۇران سۇرەلەرىن دۇرىس وقىماعانى ءۇشىن بالالاردى ۇردى» دەگەن پىكىر شىندىققا جاناسپايدى.
وسى رەتتە وقىرمانداردان ماسەلەنىڭ انىق-قانىعىنا كوز جەتكىزبەي تۇرىپ الدىن-الا بولجام ايتۋعا اسىقپاۋدى سۇرايمىز، -دەلىنگەن مالىمدەمەدە.
مالىمەت بويىنشا، «تاسپاۋ ءسالىمباي» مەشىتىنىڭ ۇستازى رۇستەم اسقاروۆ كامەلەتكە تولماعان بالالاردى ءۇي جاعدايىندا وقىتىپ، ولارعا قول جۇمساپ، ءدىن قىزمەتكەرىنىڭ ەتيكاسىن (مۇسىلماندىق، ۇستازدىق ادەپتى ساقتاماۋ، وزگەلەرگە زيان تيگىزۋ ت.ب.) قاتاڭ بۇزعان.
قازاقستان مۇسىلماندارى ءدىني باسقارماسى بۇل وقيعادان ءتيىستى قورىتىندى شىعاردى جانە ورەسكەل ارەكەتكە جول بەرگەن ءدىن قىزمەتكەرلەرىنە شارا قولداندى. بۇگىن، 2023 جىلدىڭ 15 ماۋسىمىندا رۇستەم اسقاروۆ باس ءمۇفتي بۇيرىعىمەن «تاسپاۋ ءسالىمباي» مەشىتىنىڭ ۇستازى قىزمەتىنەن بوساتىلدى.
قازىر بۇل ماسەلەمەن قۇقىق قورعاۋ ورگاندارى اينالىسۋدا، دەلىنگەن قازاقستان مۇسىلماندار ءدىني باسقارماسىنىڭ ءباسپاسوز حاتشىسى بەرگەن حابارلامادا.