الماتى وبلىسىندا "باعاناشىل" بالالار ءۇيىنىڭ تاربيەلەنۋشىلەرىن كوشىرۋ ىسىنە بايلانىستى بىردەن ءۇش شەنەۋنىك قىزمەتىنەن ايىرىلدى. بۇل اقپاراتتى 12 تامىزدا وبلىس اكىمدىگىنىڭ ءباسپاسوز قىزمەتى راستادى، دەپ حابارلايدى “ادىرنا”.
"قازاقستان رەسپۋبليكاسى پرەزيدەنتى اكىمشىلىگىمەن كەلىسىم بويىنشا وبلىس اكىمىنىڭ ورىنباسارى بولات كۇرەنبەكوۆ قىزمەتىنەن بوساتىلدى. سونىمەن قاتار ءبىلىم باسقارماسىنىڭ باسشىسى سالتانات بەسپاەۆا مەن ىشكى ساياسات باسقارماسىنىڭ باسشىسى ەرىك ءابىتوۆ تە قىزمەتتەرىنەن بوساتىلدى. وبلىس اكىمىنىڭ ءبىرىنشى ورىنباسارىنا قاتاڭ سوگىس جاريالاندى", – دەدى الماتى وبلىسى ءبىلىم باسقارماسى باسشىسىنىڭ ورىنباسارى ديانا ونبىرباەۆا.
ايتا كەتسەك، 31 شىلدەدە الماتى قالاسىنىڭ اكىمدىگى "باعاناشىل" بالالار ءۇيىنىڭ تاربيەلەنۋشىلەرى ءوز ورتالىعىنىڭ اۋماعىندا تۇرىپ، الماتىدا ءبىلىم الۋدى جالعاستىراتىنىن مالىمدەدى. الماتى جانە الماتى وبلىسى اكىمدىكتەرى نىساندى بەرۋ بويىنشا جۇمىستار جۇرگىزىپ جاتقانى اتاپ ءوتىلدى.
ال 1 تامىزدا الماتى قالاسىنىڭ اكىمدىگى "باگاناشىل" بالالار ءۇيى قىزمەتكەرلەرىنىڭ جۇمىستان بوساتىلۋىنا قاتىستى اقپاراتقا تۇسىنىكتەمە بەردى.
