قازاقستاندا بالالار ءۇيىنىڭ سانى قىسقاردى. بۇل تۋرالى مينيستر اسحات ايماعامبەتوۆ ءمالىم ەتتى. ول سوڭعى ءۇش جىلدا بالالار ۇيىندە تاربيەلەنۋشىلەردىڭ سانى 32%-كە (6223-تەن 4254-كە دەيىن), ال بالالار ءۇيى 30%-كە (138-دەن 96-عا دەيىن) قىسقارعانىن ايتىپ جەتكىزدى. بۇل تۋرالى "ادىرنا" ۇلتتىق پورتالى حابار 24 ارناسىنا سىلتەمە جاساپ حابارلايدى.
بالا اسىراپ الۋشى اتا-انالار مەكتەپتەرى جۇمىسىنىڭ ناتيجەسىندە بالالار ۇيلەرىنە قايتارىلعان جەتكىنشەكتەردىڭ دە سانى ازايدى.
اسحات ايماعامبەتوۆ مينيسترلىك جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ قۇقىقتارىن قامتاماسىز ەتۋ ماسەلەلەرىنە ەرەكشە نازار اۋداراتىنىن اتاپ ءوتتى. جەتىم بالالاردى ورنالاستىرۋعا جاردەم كورسەتۋ جونىندەگى ۇيىمداردىڭ قىزمەتى، ولاردى اككرەديتتەۋگە قويىلاتىن تالاپتار، سونداي-اق الەۋەتتى اسىراپ الۋشى اتا-انالاردى مىندەتتى دايارلاۋ راسىمدەرى رەتتەلگەن.
"اتالعان شارالاردى ەنگىزۋ بالالار ۇيىندە تاربيەلەنەتىن بالالار سانىن ازايتۋعا، سونداي-اق بالالار ۇيلەرىنە قايتارىلعان جەتكىنشەكتەردىڭ سانىن تومەندەتۋگە مۇمكىندىك بەردى. رەسپۋبليكادا 23 063 جەتىم جانە اتا-اناسىنىڭ قامقورلىعىنسىز قالعان بالا بار، ولاردىڭ 81,5%-ءى اسىراپ الۋشى وتباسىلاردا تاربيەلەنىپ جاتىر", – دەپ اتاپ ءوتتى مينيستر اسحات ايماعامبەتوۆ.
سونداي-اق ءبىلىم جانە عىلىم مينيسترلىگى ينكليۋزيۆتى ءبىلىم بەرۋدى دامىتۋ ءۇشىن جۇمىس جۇرگىزىپ جاتىر. ءبىلىم الۋدا ەرەكشە قاجەتتىلىكتەرى بار بالالاردىڭ قۇرداستارىمەن قاتار جالپى ءبىلىم بەرەتىن مەكتەپتە وقۋىنا جاعداي جاسالىپ جاتىر. بيىل ەرەكشە قاجەتتىلىكتەرى بار بالالاردى جان باسىنا قارجىلاندىرۋ وسەدى. بۇل بالالاردىڭ باسىم بولىگىن ينكليۋزيۆتى ءبىلىم بەرۋمەن قامتۋعا مۇمكىندىك بەرەدى.
بۇعان قوسا، بيىل مەكتەپتەردە العاش رەت پەداگوگ-اسسيستەنت لاۋازىمى ەنگىزىلدى. ولار ءبىلىم الۋدا ەرەكشە قاجەتتىلىكتەرى بار بالالارعا پسيحولوگيالىق جانە پەداگوگيكالىق كومەك كورسەتەدى.
