شىمكەنت قالاسىندا وسى جىلدىڭ باسىنان كوروناۆيرۋس جۇقتىرعان 1253 ناۋقاس انىقتالدى. ەمدەلىپ شىققان ناۋقاستاردىڭ سانى 161. وكىنىشكە وراي، 7 ناۋقاس قايتىس بولعان. بۇگىنگە 1085 ناۋقاس ەمدەلىپ جاتىر، ونىڭ ىشىندە ستاتسيوناردا 179 ناۋقاس، 906 ناۋقاس ءۇي جاعدايىندا امبۋلاتورلىق ەم قابىلداۋدا. بۇل جونىندە اكىمنىڭ توراعالىعىمەن ونلاين رەجيمدە وتكەن جيىندا قالالىق دەنساۋلىق ساقتاۋ باسقارماسىنىڭ باسشىسى ب.پوزيلوۆ مالىمدەدى.
ينفەكتسيالىق ستاتسيونارلاردىڭ دايىندىعىن بايانداعان باسقارما باسشىسى ەپيدەميولوگيالىق جاعداي ناشارلاسا، توسەك-ورىن سانىن 4 016-كە دەيىن، ال ەپيدەميولوگيالىق داعدارىس ورىن السا، 5 416 توسەك-ورىن اشىلاتىنىن جەتكىزدى. قازىرگى تاڭدا توسەك-ورىن تولىمدىلىعى 44 پايىزدى قۇرايدى.
تۇرعىنداردىڭ ەكپە الۋ جاعدايىنا توعتالعان ول بۇگىنگى كۇنى ءتيىستى كونتينگەنتتىڭ (596205 ادام) 1-ءشى كومپونەنتپەن 99,5%، 2 كومپونەنتپەن 97% ۆاكتسيناتسيالانعانىن اتاپ ءوتتى.
2021 جىلدىڭ 15 قاراشاسىنان باستاپ 12-18 جاسقا دەيىنگى بالالار، جۇكتى جانە بالا ەمىزەتىن ايەلدەردىڭ «Pfizer-BioNTech» ۆاكتسيناسىمەن ۆاكتسيناتسيالاۋ باستالدى. بۇل ۆاكتسيناتسيانىڭ ءبىرىنشى كومپونەنتىمەن 18 816 ادام، ەكىنشى كومپونەنتىمەن 8 864 ادام ەگىلگەن. ال، ۆاكتسينانىڭ ءۇشىنشى دوزاسىمەن بۇگىنگە 41 773 ادام رەۆاكتسيناتسيالاندى.
قالا اكىمى جوعارىدا ايتىلعانداردى ەسكەرە وتىرىپ، قالانىڭ باس دارىگەرىنە كوروناۆيرۋس ينفەكتسياسىنىڭ الدىن الۋ، ەمدەۋ شارالارىن ءتيىمدى ۇيىمداستىرۋدى جانە جاعدايدى قاتاڭ باقىلاۋعا الۋدى تاپسىردى.
سونىمەن بىرگە، تۇرعىندار اراسىندا سانيتارلىق تالاپتاردى ساقتاۋ بويىنشا تۇسىندىرمە جۇمىستارىن كۇشەيتۋدى ايتتى.
شىمكەنت قالاسى اكىمدىگىنىڭ ءباسپاسسوز قىزمەتى
