شىمكەنتتە ءۇش كۇننەن بەرى تولاسسىز جاڭبىر جاۋىپ جاتىر. وسىعان بايلانىستى قالاداعى كوممۋنالدىق قىزمەتتەر تاۋلىك بويى تىنىمسىز جۇمىس ىستەۋدە. ولار قالاداعى كوشەلەردىڭ بويىنا، ارىق-اتىزدار مەن ساي-سالالارعا جينالعان سۋدى ارنايى تەحنيكانىڭ كومەگىمەن سورىپ، تازالاۋدا.
ماسەلەن، ءال-فارابي اۋدانىندا بۇل جۇمىسقا 5 اسسەنيزاتورلىق ماشينا، 2 موتوپومپا قۇرىلعىسى جانە 57 جۇمىسشى تارتىلعان. اۋدان اۋماعى 7 سەكتورعا ءبولىنىپ، ونىڭ ارقايسىسىندا كەزەكشىلىك ۇيىمداستىرىلعان. بەكىتىلگەن ماماندار يرريگاتسيالىق ارىقتاردى سۋدان ۇزدىكسىز تازارتىپ جاتىر.
ەڭبەكشى اۋدانى اۋماعىندا دا وسىنداي جۇمىستار جۇرگىزىلۋدە. اتاپ ايتقاندا، №1 اۆتوجول (تەمىر جول كوپىرىنىڭ استى) جانە ارعىنبەكوۆ، ديزەلنايا، اتا زاڭ، قىزعالداق، مامبەتوۆ كوشەلەرىنىڭ بويى جاڭبىر سۋىنان تازارتىلدى. وعان 8 دانا اسسەنيزاتورلىق ماشينا، زيل-130 كولىگىنە ورناتىلعان 4 دانا موتوپومپا جانە «لتد-تۇرمىس» جشس-ءىنىڭ 83 جۇمىسشىسى جۇمىلدىرىلعان.
اۋا رايىنىڭ قولايسىزدىعى اباي اۋدانىندا دا كوشەلەر مەن ارىق-اتىزدارعا مولشەردەن تىس سۋ جينالۋىنا سەبەپ بولدى. اسىرەسە، 112 ورامدا ورنالاسقان شىنار، يۋناتوۆ، اققاراعان كوشەلەرى مەن قاتىنكوپىر، شۇعىلا، تەلمان، اقنيەت شاعىن اۋداندارىندا سۋدىڭ مول جينالۋى تۇرعىندارعا قولايسىزدىقتار تۋعىزا باستاعان. سول سەبەپتى جەدەل تۇردە سۋ سورۋ جۇمىستارى قولعا الىندى. اباي اۋدانىندا بۇل جۇمىسقا 34 تەحنيكا جانە 105 جۇمىسشى قاتىسۋدا. سونىمەن قاتار، اۋدان اۋماعىندا سانيتارلىق تازالىق جۇمىستارى كەستەگە سايكەس تۇراقتى تۇردە اتقارىلۋدا. «اقسەمسەر» جشس-ءىنىڭ 70-كە جۋىق قىزمەتكەرى مەن 23 تەحنيكاسى تارتىلىپتى.
سۋ سورۋ جۇمىستارىنا قاراتاۋ اۋدانىندا دا ەرەكشە نازار اۋدارىلىپ، بۇگىندە وعان 41 دانا تەحنيكا، 45 جۇرگىزۋشى جانە 180 ادام اتسالىسىپ جاتىر.
شاھاردا جاۋاپتى مەكەمەلەردىڭ قىزمەتكەرلەرى دەر كەزىندە ارەكەت ەتىپ، جاۋىن زارداپتارىنىڭ الدىن الدى. ءتورت اۋدان بويىنشا كوشەلەر، ارىق-اتىزداردى تازارتۋعا 80-نەن استام تەحنيكا جانە 550-گە جۋىق ادام جۇمىلدىرىلدى.
ايتا كەتسەك، شىمكەنت قالاسىنىڭ اكىمدىگى تۇرعىنداردان سۋ جينالعان ورىنداردى بايقاعان جاعدايدا «I-Komek 109» سيتۋاتسيالىق ورتالىعىنىڭ 109 بىرىڭعاي بايلانىس تەلەفون نومىرىنە حابارلاۋدى سۇرايدى.
