كونە وسيەت كىتابىندا مىناداي ءتامسىل بار. مۇسا پايعامبار حالقىن مىسىردان الىپ شىعىپ، سيناي تاۋىنىڭ بوكتەرىنە قونىستانادى. شۋلاعان حالىق مۇسادان «ەندى نە ىستەيمىز؟» دەپ بۇيرىق كۇتەدى.
بىلايىنشا ايتقاندا، كوممۋنيكاتسيانىڭ ناقتى بولعانىن قالايدى. مۇسا نە ايتارىن بىلمەي، قۇدايدان ايان كۇتىپ، سيناي تاۋىنىڭ باسىنا بارىپ جاتىپ الادى. ءبىر كۇن ەمەس، ەكى كۇن ەمەس، قىرىق كۇن جاتادى.
كوشباسشىسىز قالعان حالىق نە ىستەرىن بىلمەي، اركىمدى ءبىر تىڭداپ، اركىمگە ءبىر سەنىپ، قولدان التىن تورپاق جاساپ الىپ، سوعان سىيىنىپ كەتەدى.
بۇل ءاپسانا قۇراندا دا بار. مۇسا پايعامبار تومەن تۇسسە، حالىق قولدان قۇداي جاساپ العان، ونى ەشكىم تىڭدامايدى. بيلىكتەن ايىرىلىپ قالعان. بيلىك دەگەن – سەنىم. حالىق مۇساعا ەمەس، التىن تورپاققا، بىلايىنشا ايتقاندا، بولمايتىن نارسەگە سەنەدى…
بۇل ءاپسانا بىزگە نەنى مەڭزەيدى؟
ليدەرلىك - بۇل فۋنكتسيالار جيىنتىعى. سونىڭ ءبىرى - كوممۋنيكاتسيا. مەيلى ەل باسقار، مەيلى كومپانيا باسقار.
مىناداي جاقسى كەيس بار.
30-جىلدارى اقش-تى داعدارىس جايلاعان كەزەڭدە فرانكلين رۋزۆەلت راديو ارقىلى تىكەلەي ەفير جۇرگىزىپ وتىرعان. ول “وشاق باسىنداعى اڭگىمە” (Fireside chats) دەگەن اتپەن تانىمال بولعان راديو باعدارلاما 1933 جىلدان 1944 جىلعا دەيىن ەفيردەن تۇسپەگەن.
ول كەزدە تەلەديدار كوپ ۇيدە جوق. كوممۋنيكاتسيا قۇرالدارىنىڭ قازىرگىدەي دامىماعان كەزى. ميلليونداعان ادام راديوعا قۇلاق ءتۇرىپ، كۇتىپ وتىراتىن بولعان.
تاريحشىلاردىڭ ايتۋىنشا، رۋزۆەلتتىڭ راديو ارقىلى جاعدايدى بايانداپ وتىرۋى اقپاراتتىق ۆاكۋمگە جول بەرمەي، امەريكانىڭ داعدارىستان جىلدام شىعۋىنا اسەر ەتىپتى.
سەبەبى داعدارىس كەزىندە حالىق ليدەرگە قۇلاق تۇرەدى. قازىر بىزدە دە پرەزيدەنتتىڭ ءار ءسوزىن ەلدىڭ كۇتىپ جۇرگەنى سودان. ليدەردەن نەگىزگى ءۇش فۋنكتسياسىن اتقارعانىن قالايدى: باعدارلاۋ، قورعان بولۋ، ءتارتىپ ورناتۋ.
وعان قوسا، اقپاراتىڭ عاسىرىندا ادامداردىڭ اقپاراتقا دەگەن قاجەتتىلىگى كۇرت ارتىپ كەتتى. تەلەفون قاراپ، جاڭالىق وقىماساق، اس باتپايتىن كۇيگە جەتتىك.
ودان بولەك، اقپارات كانالدارى دا كوبەيدى. دەمەك اقپاراتتى بۇرمالاۋ، فەيك تاراتۋ دا كۇرت ارتقانىن كورىپ وتىرمىز.
وسىندايدا كوشباسشىلىق كوممۋنيكاتسيانىڭ ماڭىزى جوعارى. كوممۋنيكاتسيا ماماندارى تابىستىلىقتىڭ 60 پايىزى كوممۋنيكاتسياعا بايلانىستى ەكەنىن ايتادى (ۋسپەح نا 60% زاۆيسيت وت كوممۋنيكاتسي)
وسى تۇرعىدان العاندا پرەزيدەنتتىڭ بەرگەن سۇحباتتارى، باياندامالارى قازىرگى ۋاقىتتا وتە ماڭىزدى. اسەرلەپ ايتساق، ەلدىڭ تۇتاستىعى مەن اۋىزبىرلىگى ءۇشىن اۋا مەن سۋ سياقتى فيزيولوگيالىق قاجەتتىلىك دەسەك تە بولعانداي.
شىڭعىس مۇقان
