انا مەن نارەستە ءولىم-ءجىتىمىن بولدىرماۋ ماقساتىندا شىمكەنتتەگى قالالىق پەرزەنتحانا مەن №2 قالالىق اۋرۋحانانىڭ بوسانۋ بولىمشەسىن 3-ءشى دەڭگەيگە، ال، №3 قالالىق اۋرۋحانانىڭ بوسانۋ بولىمشەسىن 2-ءشى دەڭگەيگە اۋىستىرۋ جوسپارلانۋدا. قالا اكىمى مۇرات ايتەنوۆكە بەرگەن ەسەپتى جيىندا دەنساۋلىق ساقتاۋ باسقارماسىنىڭ باسشىسى ب.پوزيلوۆ وسىلاي دەدى.
ەكىنشى دەڭگەيدە فيزيولوگيالىق بوساندىرۋ بولسا، 3-ءشى دەڭگەيگە وتكەندە، ءارتۇرلى پاتولوگياسى بار پاتسيەنتتەردى قابىلداۋعا مۇمكىندىك ارتادى.
سونىمەن قاتار، مەديتسينا قىزمەتكەرلەرىنىڭ 30 پايىزىنا يزرايل، گەرمانيا، رەسەي جانە ليتۆانىڭ جەتەكشى ماماندارىمەن شەبەرلىك ساباقتارى وتكىزىلەتىن بولادى.
باسقارما باسشىسى 1 جاسقا دەيىنگى بالالاردى پرواكتيۆتى باقىلاۋمەن جانە سكرينينگتەرمەن قامتۋ ۇلعايتىلاتىنىن جانە بالالار اۋرۋحاناسىنىڭ بازاسىندا كارديوحيرۋرگيا، وفتالمولوگيا، ۋرولوگيا، ەندوكرينولوگيا، نەۆرولوگيا، نەيروحيرۋرگيا، كومبۋستيولوگيا سىندى جاڭا بولىمشەلەر اشىلاتىنىن اتاپ ءوتتى.
انا مەن نارەستە ءولىم-ءجىتىمىن الدىن-الۋ ءۇشىن جۇكتى ايەلدەردى بوسانۋعا دەيىنگى جەكە جانە سالاارالىق باقىلاۋمەن قامتۋدى 83 پايىزعا ۇلعايتۋ جوسپارلانعان.
اكىم باسقارما باسشىسىنا تۇرعىندارعا قولجەتىمدى جانە ساپالى مەديتسينالىق كومەك كورسەتىلۋىن ۇنەمى باقىلاۋدا ۇستاۋدى، جۇكتى ايەلدەردىڭ دەنساۋلىعىن ساقتاۋ جانە بالالاردىڭ دەنساۋلىعىن نىعايتۋ بويىنشا جۇيەلى جۇمىستاردى اتقارۋدى جانە ادامداردىڭ تەگىن مەديتسينالىق كومەكتىڭ كەپىلدىك بەرىلگەن كولەمىن الۋ قۇقىقتارىنىڭ ىسكە اسىرىلۋىن قامتاماسىز ەتۋدى تاپسىردى.
شىمكەنت قالاسى اكىمدىگىنىڭ ءباسپاسوز قىزمەتى
