قر ۇكىمەتى تاراپىنان تۇرعىن ۇيگە مۇقتاج ازاماتتاردىڭ جاعدايىن جاقسارتۋ ماقساتىندا تۇرعىن ءۇيدىڭ جالداۋ اقىسىن سۋبسيديالاۋ تەتىگىن ەنگىزۋ قاراستىرىلۋدا. باسپانانى جالداۋ قۇنىن سۋبسيديالاۋ مەحانيزمى بۇگىنگى ۇكىمەت وتىرىسىندا تالقىلاندى.
سەلەكتورلىق جيىنعا شىمكەنت قالاسىنىڭ اكىمى م.ايتەنوۆ، ورىنباسارلارى مەن باسقارما باسشىلارى قاتىستى.
بۇگىنگى تاڭدا شىمكەنتتە تۇرعىن ءۇي الۋ تىزىمىنە 48 623 ازامات تىركەلگەن. ونىڭ ىشىندە: 16 957 – حالىقتىڭ الەۋمەتتىك جاعىنان ءالسىز توبى; 9 186 – كوپبالالى وتباسىلار; 1 819 – جەتىم جانە اتا-اناسىنىڭ قامقورلىعىنسىز قالعان بالالار; 27 – جالعىز تۇرعىن ءۇيى اپاتتى جاعدايدا دەپ تانىلعان ازاماتتار; 20 634 – مەملەكەتتىك قىزمەتشىلەر، بيۋدجەتتىك ۇيىم جانە اسكەري قىزمەتشىلەر. بيىل جالپى 3 701 ازاماتتى باسپانامەن (748 كەزەكتەگىلەرگە جانە 857 جۇمىسشى جاستارعا ارەندالىق، 2 096 كرەديتتىك) قامتاماسىز ەتۋ كوزدەلۋدە.
ال، اتاۋلى كومەك بويىنشا ءتىزىم مەحانيزم دايىندالعاندا عانا جاساقتالاتىن بولادى. باسپانانى جالعا الۋدىڭ ءبىر بولىگىن تولەۋ قاعيداتىنا سايكەس 50% - مەملەكەت، قالعان 50% - ىن پاتەر جالداۋشى ءوز بەتىنشە تولەيدى. قايتالاما تۇرعىن ءۇيدى جالعا الۋ ءۇشىن وتباسىنىڭ ءاربىر مۇشەسىنە شاققانداعى تابىسى 1 ەڭ تومەنگى كۇنكورىس دەڭگەيىنەن تومەن (36 018 تگ) كەزەكتە تۇرعان كوپبالالى وتباسىلار، جەتىم جانە اتا-اناسىنىڭ قامقورلىعىنسىز قالعان بالالار، 1,2 توپ مۇگەدەكتەرى، مۇگەدەك بالا تاربيەلەۋشى وتباسىلارعا ۇسىلماق. اتالعان سۋبسيديالاۋ مەحانيزمىنىڭ باستى وپەراتورى بولىپ «وتباسى بانكى» بەلگىلەندى.
ءوتىنىش بەرۋشىلەر ءۇشىن نەگىزگى تالاپتار:
-قازاقستان رەسپۋبليكاسىنىڭ ازاماتتىعى;
- وتباسىنىڭ (ازاماتتىڭ) سوڭعى 6 (التى) ايدا وتباسىنىڭ ءاربىر مۇشەسىنە شاققاندا ەڭ تومەن كۇنكورىس دەڭگەيىنىڭ 1 ەسەلەنگەن (36 018 تگ) شاماسىنان اسپايتىن جيىنتىق تابىسىنىڭ بولۋى;
- تۇرعىن ۇيگە مۇقتاج رەتىندە ەسەپكە قويۋدى جانە تۇرعىن ۇيگە مۇقتاج مارتەبەسىن راستاۋ بولىپ تابىلادى
- قۇقىقتىق كاداستردا تىركەلگەن تۇرعىن ءۇي يەسى مەن جالعا الۋشى اراسىندا جاسالعان شارتتىڭ بولۋى.
جاڭا مەحانيزم مۇددەلىك ورگاندارمەن بەكىتىلىپ كەلىسىلگەن سوڭ عانا مامىر ايىندا ىسكە قوسىلادى دەپ كۇتىلۋدە.
شىمكەنت قالاسى اكىمدىگىنىڭ ءباسپاسوز قىزمەتى
