ماجىلىسمەندەر جالاقىدان جالاقىعا دەيىن ءومىر سۇرەتىندەرىن ايتادى. بۇعان قاراماستان ولار موراتوريگە قارسى شىقپادى. ءبىراۋىزدان الداعى 5 جىل جالاقىلارىنىڭ وسپەيتىنىمەن كەلىستى، دەپ حابارلايدى “ادىرنا” ۇلتتىق پورتالى كتك ارناسىنا سىلتەمە جاساپ.
"جالاقى تۇسەتىن بانك كارتاسى جۇبايىمدا. ول اي سايىن 630-650 مىڭ تەڭگە تۇسەتىنىن ايتادى. ەتتى اۋىلدان، تۋىستارىمنان الامىز. بىلەسىزدەر، قازىر ينفلياتسيا، باعالار كوتەرىلۋدە. سوندىقتان جالاقىدان جالاقىعا دەيىن ءومىر سۇرەمىز دەۋگە بولادى", - دەيدى ءماجىلىس دەپۋتاتى ەرلان سايروۆ.
5 جىل جالاقىنىڭ وسپەۋى تۋرالى موراتوري مينيسترلەر مەن اكىمدەر جالاقىسىنا دا قاتىستى بولادى. مەملەكەتتىك قىزمەتكەرلەردىڭ جالاقىسى جەتكىلىكتى دەڭگەيدە دەگەن پرەزيدەنت وسىنداي شەشىم قابىلداعان ەدى. ال وزگە جۇمىسشىلاردىڭ جالاقىسى كەرىسىنشە وسە تۇسپەك.
جالاقى ماسەلەسى 2021 جىلدىڭ سوڭىنا قاراي قىزۋ تالقىعا تۇسكەن. بۇل كەزدە مينيسترلەردىڭ ورتاشا جالاقىسى 900 مىڭ، ال وبلىس اكىمدەرى 1,8 ميلليون تەڭگە الاتىنى بەلگىلى بولعان ەدى. ال ءماجىلىس دەپۋتاتتارى ءوز ايلىقتارىنىڭ 500 بەن 800 مىڭ ارالىعىندا ەكەنىن مالىمدەگەن. ينفلياتسياعا قاراماستان دەپۋتاتتار موراتوريگە قاتىستى قارسىلىقتارىن بىلدىرمەدى.
"قازىرگى جالاقى جەتكىلىكتى دەۋگە بولادى. سەبەبى بۇعان دەيىنگى لاۋازىمداردا مۇنداي جالاقى الماعانمىن. مەن ءۇشىن بۇل اجەپتەۋىر سومما. ءومىر ءسۇرۋ ءۇشىن جانە باسقا يدەيالاردى جۇزەگە اسىرۋعا جەتەدى دەپ ويلايمىن", - دەپ مالىمدەدى ءماجىلىس دەپۋتاتى ەلنۇر بەيسەنباەۆ.
“ادىرنا” ۇلتتىق پورتالى
