بۇرىنعى دەپۋتات ءوزىن ەموتسيونالدى تۇردە دورەكى سويلەگەنىن مويىندادى، دەپ جازادى "ادىرنا" پورتالى.
نۇر-سۇلتان قالاسىنىڭ اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتى ەكس-دەپۋتات بەكبولات تىلەۋحاندى Vesti.kg سايتىنىڭ ءتىلشىسى اينۇر قوسكيناعا كۇش قولدانعانى ءۇشىن كىنالى ەمەس دەپ تاپتى.
«اكىمشىلىك قۇقىق بۇزۋشىلىق قۇرامىنىڭ جوقتىعىنا بايلانىستى بۇل ءىس بويىنشا ءىس جۇرگىزۋ توقتاتىلسىن»، - دەپ حابارلادى سۋديا.
تاراپتار 10 كۇن ىشىندە اپەللياتسيالىق شاعىم بەرە الادى.
"سۋديا، كورىپ تۇرسىز با، مەن قاتتى ەموتسيونالدى اداممىن. مەن ونى ۇردىم دەپ ويلامايمىن، بىراق ءوز ويىمدى ەموتسيونالدى تۇردە بىلدىرگەنىمدى مويىندايمىن. اينۇر قوسكينادان اۋىر ايتقان سوزدەرىم ءۇشىن كەشىرىم سۇرايمىن", - دەدى بەكبولات تىلەۋحان سوت بارىسىندا.
جۋرناليست ءوز كەزەگىندە تاتۋلاسۋ مۇمكىندىگىنەن باس تارتتى. ونىڭ ادۆوكاتى اسەل توقاەۆا ەكس-شەنەۋنىكتىڭ كىناسىن جانە ونىڭ اكىمشىلىك جازاعا تارتىلعانىن قالايتىنىن العا تارتتى.
«بۇل شەشىمگە شاعىمدانامىز.مەن سۋديانىڭ بەكبولات تىلەۋحاننىڭ ونداي نيەتى بولعان جوق دەگەن سوزىنە توقتالعىم كەلەدى. ولاي بولسا، ءبىزدىڭ ەلدە بىرەۋدى ۇرىپ-سوعۋعا بولادى دا، سوسىن ونداي نيەتى بولعان جوق دەپ، قۇتىلىپ كەتۋگە بولا ما؟ «نەگە مەن وسى ۋاقىتقا دەيىن سوڭىنا دەيىن باردىم، ويتكەنى جۋرناليستەرگە دەگەن وسىنداي كوزقاراس كوپ. قوعامدىق الاڭ، قوعامدىق ادامعا سۇراق قويىلادى دەگەن تۇسىنىك جوق»، - دەدى اينۇر قوسكينا.
ول بەكبولات تىلەۋحاننىڭ وتباسىنا قاتىستى جەكە سۇراق قويماعانىن، ونىڭ ساياساتكەر رەتىندە پىكىرىن بىلگىسى كەلگەنىن باسا ايتتى.
"پروتسەسس بىردە Telegram-دا بىردە WhatsApp-تا بولىپ ۇزاق ۋاقىتقا سوزىلدى. بىراق بۇگىن بەكبولات تىلەۋحان سوتتا پروتسەستىڭ تەزىرەك اياقتالۋىن قالايتىنىن مالىمدەگەندە، ساعات 22.00-دە سۋديا شەشىمدى وقيتىنىن ايتتى، بىراق كەيىنگە قالدىرۋعا دا بولار ەدى»، - دەپ اتاپ ءوتتى جۋرناليست.
ەكس-دەپۋتاتتىڭ ادۆوكاتى بولات تاستىباەۆ ەكىنشى رەت سوت-مەديتسينالىق ساراپتاما تاعايىنداۋدى سۇرادى.
جيىندا سوت-مەديتسينالىق ساراپشىسى ءاشىروۆ تە ءسوز سويلەدى. ونىڭ ايتۋىنشا، جۋرناليست سول جاق قابىرعالىق ساماي ايماعى مەن ونىڭ وڭ يىقتىڭ ارتقى بەتى جاراقات العان. ول ۆيدەوماتەريالدار بويىنشا ەكس-دەپۋتات اينۇر قوسكينا كورسەتكەن دەنە بولىكتەرىنە قول تيگىزگەنىن راستادى. الايدا كەلتىرىلگەن زالال ناقتى وسى وقيعاعا قاتىستى دەپ ايتۋعا بولمايدى.
"دەنە جاراقاتىنىڭ ارقاشان زيان كەلتىرگەن نىسانعا سايكەس كەلە بەرمەيدى. ءوزىن-ءوزى زاقىمداۋ ماسەلەسى مەديتسينالىق ساراپشىنىڭ قۇزىرىندا ەمەس. بۇل سالىستىرمالى ۇعىمدار، ءبىز مۇنىڭ ناقتى جاۋابىن بەرە المايمىز»، - دەدى ءاشىروۆ.
ادۆوكاتتار مەديتسينالىق ساراپتامادان زارداپ شەگۋشىگە سوققىنىڭ كۇشى قانداي بولعانىن ءتۇسىندىردى.
ء"ار ادامنىڭ سوققىنى قابىلداۋى، قان تامىرلارىنىڭ كۇيى ءار ءتۇرلى. بىرەۋ ءۇشىن كوپ، بىرەۋ ءۇشىن ازىراق كۇش قولدانۋ كەرەك. قانداي كۇش قولدانىلعانىن ايتا المايمىن. بىراق دەنە كوگەرەتىندەي كۇش قولدانىلعانى انىق»، - دەپ قوستى مەديتسينالىق ساراپشى.
وقيعا كەزىندە ليفتتە بولعان ءماجىلىس اپپاراتىنىڭ قىزمەتكەرى دانيار سەيفۋلليننىڭ ايتۋىنشا، ەكس-دەپۋتات قويىلعان سۇراقتارعا ۇستامدىلىقپەن جاۋاپ بەردى.
"مەن ليفتتە ۇرعان سوققان جاعدايدى كورمەدىم. بەكبولات تىلەۋحاننىڭ تەك ءشتاتيۆتى يتەرىپ جىبەرگەنىن كوردىم", - دەيدى دانيار سەيفۋللين.
الايدا ادۆوكات اسەل توقاەۆانىڭ ليفتتە ناقتى نە بولعانىن سۇراعانىنا ول جاۋاپ بەرە المادى.
"ادىرنا" ۇلتتىق پورتالى
