اقتوبەدە ەمحانا ءتىرى ادامدى "قايتىس بولدى" دەپ تىركەگەن، دەپ حابارلايدى "ادىرنا" ۇلتتىق پورتالى "دياپازونعا" سىلتەپ.
وقيعا وتكەن جىلدىڭ جازىندا بولعان. №6 قالالىق پوليكلينيكانىڭ دارىگەرى پاتسيەنتتەردىڭ تىركەۋ بازاسىنا ازاماتتىڭ قايتىس بولعانى تۋرالى قاتە مالىمەت ەنگىزگەن. كەيىن وسى دەرەككە سۇيەنگەن احاج ورگانى دا ەر ادامدى قايتىس بولعاندار تىزىمىنە قوسقان.
سونىڭ سالدارىنان ەر ادام تەگىن ءدارى-دارمەك الا الماي، نەسيە مەن سالىق تولەۋدە قيىندىقتارعا تاپ بولعان. ول مورالدىق شىعىن ءۇشىن پوليكلينيكادان 1 ميلليون تەڭگە تالاپ ەتكەن.
الايدا ەمحانا وكىلدەرى تالاپتى مويىنداماي، قاتە دەر كەزىندە تۇزەتىلگەنىن جانە مورالدىق زيان كەلمەگەنىن العا تارتتى. دارىگەر بولسا، اۆتوماتتاندىرىلعان جۇيەدە تەحنيكالىق اقاۋ بولعانىن، ونى بىردەن باسشىلىققا حابارلاعانىن ءتۇسىندىردى.
سوت مەملەكەتتىك ورگانداردىڭ تسيفرلىق بازالارىندا ازاماتتىڭ قايتىس بولعانى تۋرالى جازبا ونىڭ وزىنە جانە جاقىندارىنا مورالدىق زارداپ كەلتىرۋى مۇمكىن ەكەنىن انىقتادى. ناتيجەسىندە سوت تالاپكەردىڭ پايداسىنا شەشىم شىعارىپ، وتەماقى كولەمىن ازايتتى.
سۋديا زاينۋللينا ەمحانانى ازاماتقا زيانى ءۇشىن 200 مىڭ تەڭگە تولەۋگە مىندەتتەدى.
ەمحانا اكىمشىلىگى سوتتىڭ ءبىرىنشى ساتىداعى شەشىمىنە اپەللياتسيالىق شاعىم تۇسىرىلگەنىن حابارلادى.
