كەمەروۆو وبلىسىنىڭ بۇرىنعى گۋبەرناتورى، 73 جاستاعى امان تولەەۆ ءوڭىردىڭ حالىق دەپۋتاتتارى كەڭەسىندە مانداتقا يە بولدى، دەپ حابارلايدى تاسس ءوڭىردىڭ سايلاۋ كوميسسياسىنا سىلتەمە جاساپ.
«بۇگىن كەمەروۆو وبلىستىق سايلاۋ كوميسسياسىنىڭ وتىرىسى ءوتتى. وندا ءتورتىنشى شاقىرىلىمداعى كەمەروۆو وبلىستىق حالىق دەپۋتاتتارى كەڭەسىنىڭ بوس مانداتىن «ەدينايا روسسيا» پارتياسىنىڭ كەمەروۆو وڭىرلىك بولىمشەسىنەن تولەەۆ امانگەلدى مولداعازىۇلىنا بەرۋ ماسەلەسى قارالدى. بوس دەپۋتاتتىق مانداتتى وعان بەرۋ تۋرالى شەشىم قابىلداندى»، - دەدى سايلاۋ كوميسسياسىنىڭ وكىلى.
سونداي-اق، ول 2013 جىلى وبلىستىق كەڭەس دەپۋتاتتارىن سايلاۋدا «ەدينايا روسسيا» پارتياسىنىڭ ۇسىنعان كانديداتتار تىزىمىندە تولەەۆتىڭ كوش باستاپ تۇرعانىن اتاپ ءوتتى.
73 جاستاعى امان تولەەۆ كەمەروۆو وبلىسىن 1997 جىلدان بەرى باسقارىپ كەلدى. ول كەمەروۆودا بولعان قايعىلى جاعدايدان كەيىن رف پرەزيدەنتى ۆلاديمير پۋتينگە ءوز ەركىمەن قىزمەتىنەن كەتۋ تۋرالى ءوتىنىش بىلدىرگەن ەدى.
"ۇلت" پورتالى
