Kemerovo oblysynyń burynǵy gýbernatory, 73 jastaǵy Aman Tóleev óńirdiń halyq depýtattary keńesinde mandatqa ıe boldy, dep habarlaıdy TASS óńirdiń saılaý komıssııasyna silteme jasap.
«Búgin Kemerovo oblystyq saılaý komıssııasynyń otyrysy ótti. Onda tórtinshi shaqyrylymdaǵy Kemerovo oblystyq halyq depýtattary keńesiniń bos mandatyn «Edınaıa Rossııa» partııasynyń Kemerovo óńirlik bólimshesinen Tóleev Amangeldi Moldaǵazyulyna berý máselesi qaraldy. Bos depýtattyq mandatty oǵan berý týraly sheshim qabyldandy», - dedi saılaý komıssııasynyń ókili.
Sondaı-aq, ol 2013 jyly oblystyq keńes depýtattaryn saılaýda «Edınaıa Rossııa» partııasynyń usynǵan kandıdattar tiziminde Tóleevtiń kósh bastap turǵanyn atap ótti.
73 jastaǵy Aman Tóleev Kemerovo oblysyn 1997 jyldan beri basqaryp keldi. Ol Kemerovoda bolǵan qaıǵyly jaǵdaıdan keıin RF prezıdenti Vladımır Pýtınge óz erkimen qyzmetinen ketý týraly ótinish bildirgen edi.
"Ult" portaly
