نۇرسات شاعىن اۋدانىندا ورنالاسقان «جاس-دارىن-5» اتتى 300 ورىندىق جەكەمەنشىك مەكتەپتىڭ قۇرىلىسىمەن تانىسۋ بارىسىندا قالا اكىمى مۇرات ايتەنوۆ مەكتەپ اشۋ جاي عانا عيمارات سالۋمەن شەكتەلمەيتىنىن، ول ۇلكەن جاۋاپكەرشىلىك جۇكتەيتىنىن جەتكىزدى.
«بالاعا ءبىلىم مەن تاربيە بەرۋ ول ۇلكەن جاۋاپكەرشىلىك. سىزدەر سول جاۋاپكەرشىلىكتى سەزىنىپ، ساپالى ءبىلىم بەرۋ ءىسىن جوعارى دەڭگەيدە ۇيىمداستىرىپ، ورتا ءبىلىم بەرۋ جۇيەسىندە نەگىزگى تاسىلدەردىڭ ورىندالۋىنا باسا نازار اۋدارۋ كەرەكسىزدەر. ەڭ الدىمەن ماتەريالدىق-تەحنيكالىق بازامەن جابدىقتالۋىن جانە مەكتەپتەردىڭ ديزاينى مەن ىشكى ارلەۋ جۇمىستارىنا باسا ءمان بەرىڭىزدەر»،-دەدى قالا باسشىسى.
قۇرىلىسى وتكەن جىلى باستالعان نىسان جاڭا وقۋ جىلىندا پايدالانۋعا بەرىلەدى. جان باسىنا قارجىلاندىرۋ جۇيەسى بويىنشا قىزمەت اتقارادى. ياعني، مەملەكەت ءار وقۋشى ءۇشىن قارجى تولەيتىن بولادى.
مەكتەپتە بالالاردىڭ ءبىلىم الۋىنا بارلىق جاعدايدىڭ جاسالۋى بويىنشا اكىم ينۆەستورعا بىرقاتار ۇسىنىستار ايتتى.
شىمكەنت قالاسى اكىمدىگىنىڭ ءباسپاسوز قىزمەتى
