قاڭتار وقيعاسىنان كەيىن تالدىقورعان قالاسىندا ۇستالعان 20 جاستاعى ەربول ىدىرىسوۆتىڭ اناسى قاماۋداعى ۇلىن ۇتىكپەن كۇيدىرىپ جاتقانىن مالىمدەدى، دەپ حابارلايدى Orda.kz سايتىنا “ادىرنا” ۇلتتىق پورتالى سىلتەمە جاساپ.
ءمادينا سماعۇلوۆانىڭ ايتۋىنشا، ونىڭ ۇلى 12 قاڭتاردا ءدارى-دارمەك ساتىپ الۋعا دارىحاناعا بارىپ، قالا شەتىندە ۇستالىپ، ۋاقىتشا ۇستاۋ يزولياتورىنا قامالعان. وعان ۇلىمەن كەزدەسۋگە تەك 9 اقپاندا رۇقسات بەرىلگەن.
ۇلى اناسىنا ونى جانە باسقا دا تۇتقىنداردى قۇقىق قورعاۋ قىزمەتكەرلەرى ۇرىپ-سوعىپ، قارۋ العانىن جانە ولاردىڭ قايدا ساقتالعانىن بىلەمىز دەپ مويىنداۋعا ماجبۇرلەگەنىن ايتقان.
«قارسىلىقتارعا جاۋاپ رەتىندە ولارعا: «وسىندا قالاسىڭدار» دەپ ۇرىپ-سوعىپ، تەپكىلەپ، دەنەلەرىنە ۇتىك باسقان. بالام دەنەسىندەگى قارايعان تاڭعىشتى كورسەتتى. بۇيرەگى مەن ءىشى جاراقاتتانعان. ىرىڭدەي باستاعانعا ۇقسايدى. مەنىڭ تالاپتارىمنان كەيىن عانا تۇرمە دارىگەرلەرى تەكسەرىپ، تاڭعىشتى جاڭارتتى» دەيدى ءمادينا سماعۇلوۆا ازاتتىق راديوسىنا.
ول سونداي-اق بالاسىنىڭ دەنەسىندە اياعى مەن ارقاسىنان كوگەرگەن جەرلەردى كورگەنىن ايتتى.
ءمادينا سماعۇلوۆا قۇقىق قورعاۋشىلار مەن بەلسەندىلەر حابارلاسىپ جاتقانىن، ءالى ادۆوكات جالداي الماعانىن العا تارتتى. ول ۇلىنىڭ ناقتى قانداي كۇدىككە ىلىنگەنىن، قانداي سوت اكتىلەرى شىعارىلعانىن بىلمەيدى.
ازىرگە ەربول ىدىرىسوۆقا قاتىستى رەسمي ورگاندار ەشقانداي اقپارات بەرمەدى.
“ادىرنا” ۇلتتىق پورتالى
