رەسەيدىڭ سىرتقى بارلاۋ قىزمەتىندە (سۆر) قازاقستاندا قاڭتارداعى وقيعاعا دايىندىق تۋرالى اقپارات بولعان.
بۇل تۋرالى سىرتقى بارلاۋ قىزمەتىنىڭ باسشىسى سەرگەي نارىشكين «موسكوۆسكي كومسومولەتس» گازەتىنە بەرگەن سۇحباتىندا ايتتى، دەپ حابارلايدى Orda.kz سايتىنا “ادىرنا” ۇلتتىق پورتالى سىلتەمە جاساپ.
«ارينە بولدى. بىرىنشىدەن، سيريادا تالقاندالعان دايش باندىلارىنىڭ سودىرلارى جانە باسقا دا لاڭكەستىك توپتاردىڭ ورتالىق ازيا مەملەكەتتەرىنە قول سوزعانى تۋرالى. بۇل ءبىز ءۇشىن دە، وسى مەملەكەتتەردىڭ ارنايى قىزمەتتەرى ءۇشىن دە قۇپيا ەمەس ەدى. مۇنداي قوزعالىستىڭ كىمنىڭ قامقورلىعىمەن بولعانى دا بەلگىلى بولدى. بۇعان ايماقتىڭ بارلىق مەملەكەتتەرى الاڭداۋشىلىق ءبىلدىردى. ءبىز بۇل اقپاراتتى قازاقستانداعى جانە ۇقشۇ-عا مۇشە باسقا مەملەكەتتەردەگى ارىپتەستەرمەن بولىستىك» دەدى نارىشكين.
ونىڭ ايتۋىنشا، قازاقستانداعى وقيعالار دەسترۋكتيۆتى ساياسي كۇشتەردىڭ ەكونوميكالىق ۇراندارمەن بەيبىت نارازىلىق اكتسيالارىن قالاي تەز جانە جوسپارلى تۇردە پايدالانىپ، ءارتۇرلى «ءتۇرلى-ءتۇستى رەۆوليۋتسيالار» جاساۋعا تىرىساتىنىن انىق كورسەتتى.
«بۇل كۇشتەر بارلىق باعىتتاعى سودىرلاردى قولدانۋدان باس تارتپايدى. ولاردىڭ باسشىلىعى 2014 جىلى ۋكراينادا انىق كورسەتىلگەن ىشكى ساياسي جاعدايدى شايقاۋدىڭ ستاندارتتى سحەمالارى بويىنشا جۇزەگە اسىرىلادى» دەدى رف سىرتقى بارلاۋ قىزمەتىنىڭ باسشىسى.
ونىڭ پايىمداۋىنشا، ۇقشۇ-عا مۇشە مەملەكەتتەردىڭ ءىس-ارەكەتى جەدەل جانە جاۋاپتى شەشىمدەردىڭ قالاي قابىلداناتىنىن كورسەتتى.
«ەكسترەميستىك جانە لاڭكەستىك توپتار مەن ۇيىمدار تاراپىنان قاۋىپ سەيىلگەن جوق. سودىرلار مەن ولاردىڭ جەتەكشىلەرىنىڭ باي تاجىريبەسى بار، قارجى جانە قارۋ-جاراقپەن قامتاماسىز ەتۋ جالعاسۋدا. سوندىقتان ايماقتاعى جاعدايدى تۇراقتى باقىلاۋ جانە لاڭكەستىك قاۋىپكە قارسى تۇرۋ ءۇشىن تارتىلعان مەملەكەتتەردىڭ ارنايى قىزمەتتەرىنىڭ بىرلەسكەن تىنىمسىز كۇش-جىگەرى قاجەت» دەدى نارىشكين.
“ادىرنا” ۇلتتىق پورتالى
