جاڭاوزەندەگى «بۇرعىلاۋ» جشس جۇمىسشىلارى جۇمىستىڭ توقتاتىلاتىنىن ايتىپ، جالاقىلارىن كوتەرۋدى تالاپ ەتكەن بولاتىن. ال قازىر «بۇرعىلاۋ» جشس جۇمىسكەرلەردىڭ جالاقىسى سالاداعى ەڭ جوعارى كورسەتكىشتەردىڭ قاتارىندا ەكەنىن باسا ايتتى، دەپ حابارلايدى "ادىرنا" ۇلتتىق پورتالى.
كومپانيا باسشىلىعى قىزمەتكەرلەردى قازاقستان رەسپۋبليكاسىنىڭ قولدانىستاعى ەڭبەك زاڭناماسىنا سايكەس قويىلعان بارلىق تالاپتاردى سىندارلى تالقىلاۋ ءۇشىن كەلىسسوز ۇستەلىنە وتىرۋعا شاقىردى.
– «بۇرعىلاۋ» جشس جۇمىسشىلارىنىڭ جالاقىسى قازىردىڭ وزىندە سالاداعى ەڭ جوعارىلاردىڭ قاتارىندا. كاسىپورىن بويىنشا ورتاشا ايلىق جالاقى 2021 جىلدىڭ قورىتىندىسى بويىنشا 887 مىڭ تەڭگەنى قۇرادى. سونىمەن بىرگە، ۇجىمدىق شارتقا سايكەس جالاقى جىل سايىن ينفلياتسيا دەڭگەيىنە قاراي كوتەرىلەدى. وسىلايشا، 2008-2021 جىلدار ارالىعىنداعى ورتاشا جالاقى 158 مىڭنان 887 مىڭ تەڭگەگە دەيىن ءوستى. ال 2022 جىلدىڭ 1 قاڭتارىنان باستاپ ول تاعى 10 پايىزعا ءوستى، دەپ حابارلادى كومپانيا.
مىسالى، 2022 جىلى 5-رازريادتاعى ءوندىرۋ-بارلاۋ بۇرعىلاۋشىسىنىڭ ايلىق تاريفتىك مولشەرلەمەسى 543 112 تەڭگە، بۇرعىلاۋشى كومەكشىسى - 451 463 تەڭگە. بۇل "تازا" جالاقى. بىراق جۇمىس رەجيمىن، قوسىمشا تولەمدەر مەن سىياقىلاردى ەسەپكە العاندا، ءبىر بۇرعىلاۋشىنىڭ ورتاشا جالاقىسى 1 098 191 تەڭگەنى, ال پومبۋرشىنىكى 912 874 تەڭگەنى قۇرايدى.
ەسكە سالايىق، 9 اقپاندا ماڭعىستاۋ وبلىسىنداعى كەن ورىندارىندا مۇناي كاسىپشىلىك قىزمەتىن كورسەتەتىن «بۇرعىلاۋ» كومپانياسىنىڭ 400-گە جۋىق قىزمەتكەرى جۇمىسىن توقتاتقان بولاتىن. ولار مەملەكەتكە جۇمىس بەرۋشىگە كەمىندە ءبىر ميلليون تەڭگەدەن كەم ەمەس جالاقىنى بەلگىلەۋ، ۇجىمدىق شارتتىڭ تالاپتارىن قايتا قاراۋ، كومپانيانى «قازمۇنايگاز» ۇك اق-نا بەرۋ، جۇمىسشىلاردى اۋتستاففينگكە اۋىستىرۋ سياقتى وننان استام تالاپ قويدى.
"ادىرنا" ۇلتتىق پورتالى
