«قازمۇنايگاز» ۇق» اق ەرەۋىلگە شىققان جۇمىسشىلاردىڭ تالابىنا جاۋاپ بەردى، دەپ حابارلايدى "ادىرنا" ءتىلشىسى قازاقپاراتقا سىلتەپ.
«قازمۇنايگاز» ۇك» اق باسقارما توراعاسىنىڭ ورىنباسارى نۇرسەيىت سويۋنوۆ «West Oil Software» جشس-نىڭ زاڭسىز ەرەۋىلىنە قاتىسقان جۇمىسشىلارعا بەينەۇندەۋ جولداپ، قارسىلىقتىڭ قالاي شەشىلگەنىن ايتتى.
جۇمىسشىلار قمگ قۇرامىنا قابىلداۋدى، ۇلتتىق كومپانيادا قابىلدانعان بىرىڭعاي ەڭبەكاقى تولەۋ جۇيەسىنە وتكىزۋدى جانە كاسىپورىننىڭ جابدىقتارىن جاڭارتۋدى تالاپ ەتكەن بولاتىن.
باسشىلىق ەرەۋىلشىلەردىڭ تالابىمەن كەلىسىپ، كومپانياداعى قۇرال-جابدىقتار ازىرلەنگەن باعدارلاماعا سايكەس ءۇش جىل ىشىندە تولىق جاڭارتىلادى.
الايدا ەرەۋىلگە شىققان West Oil Software ۇجىمى«قازمۇنايگاز» قۇرامىنا ەنبەيدى. باسشىلىق ەرەۋىلشىلەردىڭ بىرىڭعاي ەڭبەكاقى جۇيەسىنە كوشۋ تالاپتارى ورىنسىز جانە ولاردىڭ ورىندالمايتىنىن جەتكىزدى.
«جۇمىسشىلار قويعان نەگىزگى تالاپتارعا سايكەس، مەكەمەنىڭ قۇرال-جابدىقتارىن جاڭارتىپ، جوعارى ساپالى ەڭبەك جاعدايىن قامتاماسىز ەتۋ ماقساتىندا ءۇش جىلدىق مەرزىمگە 202 تەحنيكانى جاڭارتۋ جوسپارى بەكىتىلدى. جاڭارتۋ كەستەسىنە سايكەس كاسىپورىنعا جاڭا تەحنيكالار كەلە باستادى. 2023 جىلى 17 تەحنيكا جانە 2024 جىلدىڭ باسىنان باستاپ 4 تەحنيكا الىنىپ، ىسكە قوسىلدى. وسى جىلدىڭ سوڭىنا دەيىن بارلىعى 70 تەحنيكانى جاڭارتۋ جوسپارلانۋدا. سونىمەن قاتار، قازىر وندىرىستىك عيماراتتى جاڭعىرتۋدىڭ جوبالىق-سمەتالىق قۇجاتتاماسى ازىرلەنۋدە»، – دەدى نۇرسەيىت سويۋنوۆ.
سونداي-اق، اقپان ايىندا بولعان زاڭسىز ەرەۋىلدەن كەيىن قىزمەتىنە قايتا ورالۋعا شەشىم قابىلداعان 143 قىزمەتكەرگە ناۋرىز ايىندا جالاقى تولەنگەن.
«سىزدەرگە كۇندەلىكتى وندىرىستە وزدەرىڭىزبەن جۇمىس جاساپ، قايتادان قىزمەتتەرىن باستاعان 143 ازاماتپەن بىرگە بولىپ، جۇمىس ورىندارىڭىزعا ورالۋعا شاقىرامىن. سوزگە توقتاعان تەكتى بابالاردىڭ ۇرپاعى، كيەلى ولكەنىڭ ازاماتتارى رەتىندە ەشبىر ارانداتۋعا تۇسپەي، جۇمىسقا ورالىپ، ادال تابىس تاۋىپ وتىرعان قىزمەتتەرىڭىزگە بىلەك تۇرە قايتا كىرىسۋ قاجەت دەپ سانايمىن»، - دەدى نۇرسەيىت سويۋنوۆ.
