"قازمۇنايگاز" ۇك" اق باسقارما باسشىلىعى مۇناي وڭدەۋ زاۋىتتارىنىڭ ساتىلۋىنا قاتىستى اقپاراتتى جوققا شىعاردى، دەپ حابارلايدى "ادىرنا" ءتىلشىسى.
"بۇگىن الەۋمەتتىك جەلىلەردە جانە كەيبىر باق-تا اتىراۋ مۇناي وڭدەۋ جانە پاۆلودار مۇناي-حيميا زاۋىتتارىن جەكەشەلەندىرۋ جوسپارلانىپ وتىرعانى تۋرالى اقپارات تارادى. بۇل اقپارات شىندىققا جاناسپايتىنىن رەسمي تۇردە مالىمدەيمىن", - دەدى "قازمۇنايگاز" ۇك" اق باسقارما توراعاسىنىڭ ورىنباسارى دميتري ماكەەۆ.
ونىڭ ايتۋىنشا، "ساتىلىمعا" قاتىستى كەلىسسوز جۇرگىزىلگەن ەمەس. قازىر قمگ مۇناي وڭدەۋ زاۋىتتارىندا بارلىق وندىرىستىك پروتسەسس شتاتتىق رەجيمدە ءجۇرىپ جاتىر.
ايتا كەتەيىك، باق بەتتەرىندە الداعى ەكى جىلدا ەكى مۇناي وڭدەۋ زاۋىتىن جەكەشەلەندىرۋ تۋرالى شەشىم قازىرگى ۋاقىتتا مەملەكەتتىك ورگانداردا كەلىسۋ راسىمىنەن ءوتىپ جاتقان "ەكونوميكانى ىرىقتاندىرۋ شارالارى تۋرالى" قازاقستان پرەزيدەنتى جارلىعىنىڭ جوباسىندا قامتىلعانى حابارلانعان بولاتىن.
ءماجىلىس دەپۋتاتى ەرمۇرات باپي جەلىدەگى پاراقشاسىندا بۇل اقپاراتقا قاتىستى پىكىر بىلدىرگەن.
"ەكى بىردەي مۇناي وڭدەۋ زاۋىتىن رەسەي ساتىپ الاتىن بولسا، ەرتەڭگى كۇنىمىز كرەملدىڭ قاس-قاباعىنان تۋاتىن شەشىمگە مۇقتاج بولىپ قالماي ما؟ بۇل قانداي ەكونوميكالىق ساياساتتان تۋعان قيساپ؟ "قازمۇنايگاز" ۇلتتىق كومپانياسى مەن ەنەرگەتيكا مينيسترلىگى، مەملەكەتتىك مۇددەمىزگە، ۇلتتىق قاۋىپسىزدىگىمىزگە ادام ايتقىسۆز نۇقسان كەلتىرەتىن مۇنداي ەسۋاس ساۋدا-ساتتىققا جول بەرۋگە بولمايدى! ايتپادى دەمەڭىزدەر، ەگەر وسى ىقىلاس-ىمىراعا جول بەرىلەتىن بولسا، ءبىز قوعامدى نارازىلىق اكتسياسىنا كوتەرۋگە ءماجبۇر بولامىز! ەلدى تالان-تاراجعا سالۋدى توقتاتۋ كەرەك! جەتەدى ەندى", - دەپ جازدى دەپۋتات.
