رەسەي 1 مامىردان باستاپ «دوستىق» مۇناي قۇبىرى ارقىلى قازاق مۇنايىن گەرمانياعا جەتكىزۋدى توقتاتادى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ مالىمدەدى، دەپ حابارلايدى «ادىرنا» ءتىلشىسى تاسس-قا سىلتەمە جاساپ.
ول مۇنداي شەشىمدى «تەحنيكالىق ماسەلەلەرمەن» بايلانىستىردى جانە «قازاقستاندىق سەرىكتەستەرىمىزدىڭ بارلىق مۇددەسى باسقا باعىتتار ارقىلى قامتاماسىز ەتىلەدى» دەپ ۋادە بەردى.
جەتكىزىلىمدەردىڭ توقتاتىلۋى تۋرالى العاش بولىپ Reuters اگەنتتىگى حابارلاعان ەدى، بىراق شەشىمنىڭ سەبەبى اتالماعان. كەيىن بۇل مالىمەتتى قازاقستاننىڭ ەنەرگەتيكا ءمينيسترى ەرلان اقكەنجەنوۆ بەيرەسمي اقپاراتقا سۇيەنە وتىرىپ راستادى. مينيستر ماسەلە ينفراقۇرىلىمنىڭ زاقىمدانۋىنا بايلانىستى بولۋى مۇمكىن ەكەنىن ايتىپ، تەحنيكالىق مۇمكىندىك تۋعان بويدا ترانزيت قايتا جالعاساتىنىن جەتكىزدى.
رەسەي پرەمەر-ءمينيسترىنىڭ ورىنباسارى الەكساندر نوۆاك قازاقستان مۇنايى «باسقا بوس لوگيستيكالىق باعىتتارعا» جونەلتىلەتىنىن مالىمدەدى. ول كوپتەگەن ەل، سونىڭ ىشىندە گەرمانيا رەسەيلىك مۇناي جەتكىزىلىمدەرىنەن باس تارتقانىنا وكىنىش ءبىلدىرىپ، قۇبىر ارقىلى ايداۋ تەڭىزبەن ەكسپورتتاۋعا قاراعاندا تيىمدىرەك ەكەنىن اتاپ ءوتتى.
