اقتاۋ پورتىندا كاسپي تەڭىزىندە قازاقستاندىق مۇنايدى تاسىمالدايتىن «تاراز» جانە «ليۆا» ەكى تانكەرىن سالتاناتتى تۇردە قابىلداۋ ءراسىمى ءوتتى، دەپ حابارلايدى "ادىرنا" ۇلتتىق پورتالى. بۇل تۋرالى «قازمۇنايگاز» (قمگ) ءباسپاسوز قىزمەتى مالىمدەدى.
دەدۆەيتى 8 مىڭ توننا بولاتىن كەمەلەر ابۋ-دابي پورتتارى توبىمەن (ADP) ىنتىماقتاستىق اياسىندا وتكەن جازدا ساتىپ الىندى. قازىر ولار «Caspian Integrated Maritime Solutions Ltd» بىرلەسكەن كاسىپورنىنىڭ يەلىگىندە، ونىڭ اكتسيونەرلەرى «قازتەڭىزكولىكفلوتى» (قمگ ەنشىلەس كاسىپورنى) جانە International Maritime Investments Ltd (ADP ەنشىلەس كاسىپورنى) بولىپ تابىلادى.
كەمەلەر گوللانديالىق Damen كونتسەرنىنىڭ كەمە جاساۋ زاۋىتىندا جاسالعان. ولاردىڭ ۇزىندىعى – 140 م، ەنى – 16,7 م، تارتىلۋى – 4,2 م، جىلدامدىعى – 10 ءتۇيىن. تانكەرلەر بارلىق حالىقارالىق قاۋىپسىزدىك ستاندارتتارىنا جانە ەكولوگيالىق تالاپتارعا سايكەس كەلەدى. ولاردى 2023 جىلدىڭ جەلتوقسان ايىندا پايدالانۋعا بەرۋ جوسپارلانۋدا.
«جاڭا تانكەرلەردى الۋ ارقىلى ءبىز ترانسكاسپي باعىتىن دامىتۋدا ماڭىزدى قادام جاسادىق. وسى ورايدا مەن ستراتەگيالىق سەرىكتەسىمىز ADP-كە بىرلەسكەن جوبانى ءساتتى جۇزەگە اسىرعانى ءۇشىن العىسىمدى بىلدىرگىم كەلەدى. جاڭا تانكەرلەر الەمدىك لوگيستيكالىق نارىققا ءوز قىزمەتتەرىن ىلگەرىلەتۋ بويىنشا اۋقىمدى ماقساتتارى بار CIMS بىرلەسكەن كاسىپورنىمىزدىڭ مۇناي پاركىن كەڭەيتۋگە جول اشادى»، - دەپ اتاپ ءوتتى قابىلداۋ راسىمىندە «قازمۇنايگاز» باسشىسى ماعزۇم ميرزاعاليەۆ.
«ءبىز مۇمكىندىگىنشە كەمەلەر سانىن كوبەيتەمىز»، - دەدى ADP توراعاسى مۇحاممەد دجۋما ءال شاميسي. «ءبىز كاپيتاندار مەن ينجەنەرلەر اراسىندا تاجىريبە الماسۋ تۇرعىسىنان قازاقستانمەن جۇمىس ىستەۋگە نيەتتىمىز» دەپ قوستى ول.
قازىرگى ۋاقىتتا ءار كەمەنىڭ ەكيپاجى 13 ادامنان تۇرادى. مۇنداعى ماماندار نەگىزىنەن قازاقستاننان جۇمىس ىستەيدى.
سوڭعى 20 جىلدا قازاقستاننان مۇناي تاسىمالداۋ كقك (كاسپي قۇبىر كونسورتسيۋمى) قۇبىرى ارقىلى رەسەيدىڭ نوۆوروسسيسك قالاسىنا جەتكىزىلدى. ول ارقىلى ورتا ەسەپپەن تاۋلىگىنە 1,3-1,4 ملن باررەل مۇناي وتكەن. بۇل قازىر قازاق مۇنايىنىڭ نەگىزگى ەكسپورتتىق جولى. سوڭعى ۋاقىتقا دەيىن ول اقاۋسىز جۇمىس ىستەدى، بىراق سوڭعى بىرنەشە جىلدا جۇيە ءارتۇرلى سىرتقى فاكتورلارعا، سونىڭ ىشىندە 2021 جىلدىڭ تامىزىنداعى مۇناي توگىلۋ اپاتىنا، تپم-ءنىڭ زاقىمدالۋىنا جانە اكۆاتوريانى تەكسەرۋگە بايلانىستى سورعى شەكتەۋلەرىنە تاپ بولدى. ءبىر كۇن بۇرىن كقك قاتتى داۋىلعا بايلانىستى نوۆوروسسيسك ماڭىنداعى تەڭىز تەرمينالىنان مۇناي تاسىمالداۋدى توقتاتتى.
ءبىر جىل بۇرىن قازاقستان پرەزيدەنتى قاسىم-جومارت توقاەۆ مۇناي جەتكىزىلىمدەرىن ارتاراپتاندىرۋعا شاقىردى، ال 2023 جىلدىڭ ناۋرىزىندا قازاقستاندىق شيكىزاتتى اقتاۋ-باكۋ-تبيليسي-دجەيحان باعىتى بويىنشا رەسەي فەدەراتسياسىن اينالىپ ءوتىپ، جىلدىق كولەمى 1,5 ميلليون توننا كولەمىندە تاسىمالداۋ باستالدى. قازاقستان مەن ءازىربايجان مۇنايدى اقتاۋ-باكۋ تەڭىز جولى بويىنشا پاريتەتتىك نەگىزدە تاسىمالدايدى. جاڭا تانكەرلەر قازاقستاندىق تاراپتىڭ جىلىنا 750 مىڭ توننا مۇناي تاسىمالداۋ جونىندەگى مىندەتتەمەلەرىن تولىعىمەن وتەيدى دەپ كۇتىلۋدە.
