قازاقستاننىڭ ەنەرگەتيكا مينيسترلىگى مامىر ايىندا «دوستىق» قۇبىرى ارقىلى مۇناي ەكسپورتىنىڭ توقتاۋىنا بايلانىستى جەتكىزۋ كولەمىن بالاما باعىتتارعا قايتا بولگەنىن مالىمدەدى، دەپ حابارلايدى "ادىرنا" ۇلتتىق پورتالى.
مينيسترلىك مالىمەتىنشە، 2026 جىلعى مامىردا «دوستىق» جۇيەسى ارقىلى گەرمانياداعى شۆەدت مۇناي وڭدەۋ زاۋىتى باعىتىنا مۇناي ءترانزيتىنىڭ كەستەسى تۇزەتىلگەن. وسىعان بايلانىستى 260 مىڭ توننا مۇناي ەكسپورتى باسقا مارشرۋتتارعا قايتا باعىتتالعان. اتاپ ايتقاندا، 100 مىڭ توننا مۇناي ۋست-لۋگا پورتى ارقىلى جونەلتىلەدى، ال 160 مىڭ توننا كاسپي قۇبىر كونسورتسيۋمى جۇيەسىمەن تاسىمالدانادى.
ەنەرگەتيكا ءمينيسترىنىڭ كەڭەسشىسى ءارى رەسمي وكىلى اسەل سەرىكپاەۆانىڭ ايتۋىنشا، بۇل شەشىم جۇك جونەلتۋشىلەرمەن كەلىسىلگەن جانە تەك وپەراتسيالىق سيپاتقا يە. سونىمەن قاتار، مارشرۋتتاردىڭ وزگەرۋى مۇناي ءوندىرۋدىڭ جىلدىق جوسپارىنا اسەر ەتپەيدى.
«ەكسپورتتىق اعىنداردى قايتا باعىتتاۋ تولىق كەلىسىلگەن. قولدانىستاعى ينفراقۇرىلىم قازاقستانعا الەمدىك نارىق الدىنداعى مىندەتتەمەلەرىن تولىق ورىنداۋعا مۇمكىندىك بەرەدى»، – دەدى مينيسترلىك وكىلى.
بۇدان الدىن رەسەي 1 مامىردان باستاپ «دوستىق» مۇناي قۇبىرى ارقىلى قازاق مۇنايىن گەرمانياعا جەتكىزۋدى توقتاتاتىنىن ايتقان. ماسكەۋ مۇنداي شەشىمدى «تەحنيكالىق ماسەلەلەرمەن» بايلانىستىرعان جانە «قازاقستاندىق سەرىكتەستەرىمىزدىڭ بارلىق مۇددەسى باسقا باعىتتار ارقىلى قامتاماسىز ەتىلەدى» دەپ ۋادە بەرگەن.
