استانادا سىرتقى ىستەر مينيسترلىگىنە قاراستى «وتانداستار» قورى الەمنىڭ ءتۇرلى ەلىندە عىلىم مەن يننوۆاتسيا سالاسىندا تابىستى ەڭبەك ەتىپ جۇرگەن 40-تان استام قازاق عالىمىنىڭ العاشقى فورۋمىن ۇيىمداستىردى، دەپ حابارلايدى "ادىرنا" ۇلتتىق پورتالى.
جيىننىڭ ماقساتى — شەتەلدەگى وتانداس عالىمداردىڭ تاجىريبەسىن قازاقستاننىڭ عىلىمي-يننوۆاتسيالىق دامۋىنا باعىتتاۋ.
«وتانداستار» قورىنىڭ پرەزيدەنتى دانيار قادىروۆ فورۋمنىڭ اشىلۋىندا ءسوز سويلەدى.
ء«بىزدىڭ ماقسات — قازاقستاندى تەك ينۆەستيتسيالىق تارتىمدى ەل قانا ەمەس، شەتەلدەگى قانداس عالىمدار الەۋەتىن كورسەتۋ ارقىلى عىلىمي تارتىمدى مەملەكەت رەتىندە دە ىلگەرىلەتۋ»، — دەدى.
فورۋم اياسىندا مەديتسينا، اەروعارىش، جاساندى ينتەللەكت، نانوتەحنولوگيا جانە باسقا سالالاردىڭ ماماندارى ءوز جوبالارىن تانىستىردى. مىسالى، اقش-تىڭ بوستون قالاسىنان كەلگەن عالىم، نانوتەحنولوگ التىنبەك مۇرات QAZAQ AI جاساندى ينتەللەكت پلاتفورماسىن جاساپ، الەمنىڭ تۇكپىر-تۇكپىرىندە قازاق عالىمدارىنىڭ الەۋەتىن ەلگە تارتۋ مۇمكىندىگىن اتاپ ءوتتى.
فورۋمعا قاتىسقان مەديتسينا عىلىمدارىنىڭ دوكتورى، پسيحياتر قۇرمانبەك داۋىتقان قازاقستانداعى مۇمكىندىگى شەكتەۋلى ادامداردىڭ پسيحيكالىق دەنساۋلىعى مەن ايەلدەردىڭ بوسانۋدان كەيىنگى جاي-كۇيى ماسەلەلەرىن كوتەردى. ال حالىقارالىق ساراپشى اينۇر نوعاەۆا شەتەلدە جۇرگەن قازاق عالىمدارىنىڭ ەلگە ورالۋىنا جانە «كەرى كوش» ماسەلەسىنە نازار اۋداردى.
سونىمەن بىرگە، فورۋمعا گەرمانيا، يندونەزيا، فينليانديا، وڭتۇستىك كورەيا، موڭعوليادان كەلگەن عالىمدار قاتىسىپ، عىلىمي بايلانىس پەن تاجىريبە الماسۋدى قامتاماسىز ەتتى. ۇيىمداستىرۋشىلاردىڭ ايتۋىنشا، بۇل باسقوسۋ وتاندىق عالىمدار مەن شەتەلدىك قانداستار اراسىنداعى ىنتىماقتاستىقتى نىعايتىپ، ءىرى عىلىمي جوبالاردىڭ نەگىزىن قويادى.
فورۋم بارىسىندا ۇسىنىلعان عىلىمي جوبالار مەن ۇسىنىستار ارنايى جيناققا توپتاستىرىلىپ، مەملەكەتتىك ورگاندارعا ۇسىنىم رەتىندە جولداناتىن بولادى.
