Aqtau portynda Kaspii teŋızınde qazaqstandyq mūnaidy tasymaldaityn «Taraz» jäne «Liva» ekı tankerın saltanatty türde qabyldau räsımı öttı, dep habarlaidy "Adyrna" ūlttyq portaly. Būl turaly «QazMūnaiGaz» (QMG) baspasöz qyzmetı mälımdedı.
Dedveitı 8 myŋ tonna bolatyn kemeler Abu-Dabi porttary tobymen (ADP) yntymaqtastyq aiasynda ötken jazda satyp alyndy. Qazır olar «Caspian Integrated Maritime Solutions Ltd» bırlesken käsıpornynyŋ ielıgınde, onyŋ aksionerlerı «Qazteŋızkölıkfloty» (QMG enşıles käsıporny) jäne International Maritime Investments Ltd (ADP enşıles käsıporny) bolyp tabylady.
Kemeler gollandiialyq Damen konsernınıŋ keme jasau zauytynda jasalǧan. Olardyŋ ūzyndyǧy – 140 m, enı – 16,7 m, tartyluy – 4,2 m, jyldamdyǧy – 10 tüiın. Tankerler barlyq halyqaralyq qauıpsızdık standarttaryna jäne ekologiialyq talaptarǧa säikes keledı. Olardy 2023 jyldyŋ jeltoqsan aiynda paidalanuǧa beru josparlanuda.
«Jaŋa tankerlerdı alu arqyly bız Transkaspii baǧytyn damytuda maŋyzdy qadam jasadyq. Osy oraida men strategiialyq serıktesımız ADP-ke bırlesken jobany sättı jüzege asyrǧany üşın alǧysymdy bıldırgım keledı. Jaŋa tankerler älemdık logistikalyq naryqqa öz qyzmetterın ılgerıletu boiynşa auqymdy maqsattary bar CIMS bırlesken käsıpornymyzdyŋ mūnai parkın keŋeituge jol aşady», - dep atap öttı qabyldau räsımınde «QazMūnaiGaz» basşysy Maǧzūm Mirzaǧaliev.
«Bız mümkındıgınşe kemeler sanyn köbeitemız», - dedı ADP töraǧasy Mūhammed Djuma Äl Şamisi. «Bız kapitandar men injenerler arasynda täjıribe almasu tūrǧysynan Qazaqstanmen jūmys ısteuge niettımız» dep qosty ol.
Qazırgı uaqytta är kemenıŋ ekipajy 13 adamnan tūrady. Mūndaǧy mamandar negızınen Qazaqstannan jūmys ısteidı.
Soŋǧy 20 jylda Qazaqstannan mūnai tasymaldau KQK (Kaspii qūbyr konsorsiumy) qūbyry arqyly Reseidıŋ Novorossiisk qalasyna jetkızıldı. Ol arqyly orta eseppen täulıgıne 1,3-1,4 mln barrel mūnai ötken. Būl qazır qazaq mūnaiynyŋ negızgı eksporttyq joly. Soŋǧy uaqytqa deiın ol aqausyz jūmys ıstedı, bıraq soŋǧy bırneşe jylda jüie ärtürlı syrtqy faktorlarǧa, sonyŋ ışınde 2021 jyldyŋ tamyzyndaǧy mūnai tögılu apatyna, TPM-nıŋ zaqymdaluyna jäne akvatoriiany tekseruge bailanysty sorǧy şekteulerıne tap boldy. Bır kün būryn KQK qatty dauylǧa bailanysty Novorossiisk maŋyndaǧy teŋız terminalynan mūnai tasymaldaudy toqtatty.
Bır jyl būryn Qazaqstan prezidentı Qasym-Jomart Toqaev mūnai jetkızılımderın ärtaraptandyruǧa şaqyrdy, al 2023 jyldyŋ nauryzynda Qazaqstandyq şikızatty Aqtau-Baku-Tbilisi-Djeihan baǧyty boiynşa Resei Federasiiasyn ainalyp ötıp, jyldyq kölemı 1,5 million tonna kölemınde tasymaldau bastaldy. Qazaqstan men Äzırbaijan mūnaidy Aqtau-Baku teŋız joly boiynşa paritettık negızde tasymaldaidy. Jaŋa tankerler qazaqstandyq taraptyŋ jylyna 750 myŋ tonna mūnai tasymaldau jönındegı mındettemelerın tolyǧymen öteidı dep kütılude.
Ūqsas jaŋalyqtar
