بۇگىن شىمكەنت قالاسىنىڭ اكىمى مۇرات ايتەنوۆ سايرام تۇرعىن الابىنىڭ تاسساي بولىمشەسىنىڭ ينفراقۇرىلىم جۇيەلەرى بويىنشا اتقارىلعان جۇمىستارمەن تانىسىپ، حالقىمەن كەزدەستى.
كوممۋنالدىق ينفراقۇرىلىمى تولىق شەشىلمەگەن ەلدى مەكەن تۇرعىندارى ساپالى ەلەكتر جارىعىمەن تولىق قامتىلعان. بۇگىندە اۋىز سۋ كەستەمەن بەرىلەتىن تاسسايعا كەرەگى تۇراقتى جانە ساپالى اۋىز سۋ، كوشەلەرگە اسفالت جول جانە تابيعي گازعا قوسىلۋ.
جەرگىلىكتى تۇرعىنداردىڭ ءوتىنىشىن تىڭداعان قالا باسشىسى اۋماقتاعى تۇرعىن ۇيلەرگە تابيعي گاز جۇيەلەرىنىڭ تولىق جۇرگىزىلگەنىن، اگرس-3 نىسانى كوكتەمدە ىسكە قوسىلعاندا كوگىلدىر وتىنعا قوسۋ جۇمىستارى باستالاتىنىن،
الداعى ەكى جىلدا مەگاپوليستە اۋىز سۋ ماسەلەسى شەشىلەتىنىن جەتكىزدى.
«وزدەرىڭىز بىلەسىزدەر، مەملەكەت باسشىسى قاسىم-جومارت توقاەۆ ۇكىمەت پەن جەرگىلىكتى اكىمدىكتەرگە حالىقتى اۋىز سۋمەن قامتاماسىز ەتۋ جونىندە ناقتى مىندەت جۇكتەدى. قازىر شىمكەنتتەگى 81 ەلدى مەكەننىڭ 78-ىندە ساپالى اۋىز سۋ ماسەلەسى شەشىلگەن. قالعان ءۇش ەلدى مەكەندە اۋىز سۋ كەستە بويىنشا بەرۋدە. 2022 جىلدىڭ سوڭىنا دەيىن اۋىز سۋمەن قامتۋ كورسەتكىشى 99 پايىزعا جەتكىزۋ كوزدەپ وتىرمىز. ول ءۇشىن بيىل تاعى 1 ماگيسترالدى سۋ قۇبىرى جانە 1 ەلدى مەكەننىڭ ىشكى سۋ جۇيەلەرىنىڭ قۇرىلىسى اياقتالادى. ال، 2023 جىلدىڭ سوڭىنا قاراي شىمكەنتتىكتەر تاۋلىك بويى ۇزدىكسىز بەرىلەتىن ساپالى اۋىز سۋمەن 100 پايىزعا قامتىلادى»،-دەدى اكىم.
كوشەلەرگە اسفالت جول سالۋ بويىنشا قالالىق جولاۋشىلار كولىگى جانە اۆتوموبيل جولدارى باسقارماسىنا ناقتى تاپسىرمالار جۇكتەدى.
2 553 حالقى بار بۇل ەلدى مەكەندە 1 مەكتەپ، 1 بالاباقشا، 1 امبۋلاتوريا جانە 7 كاسىپورىن بار. وتكەن جىلى سپورت جانە ويىن الاڭشاسى سالىنعان بولسا، بيىل وسى باعىتتاعى جۇمىستاردى جالعاستىرۋ ماقساتىندا جەر تەلىمدەرىن راسىمدەۋ جۇمىستارى جۇرگىزىلۋدە.
ءسوز سوڭىندا اكىم تۇرعىنداردى الاڭداتقان ساۋالداردىڭ ءجىتى زەردەلەنەتىنىن ايتىپ، ەلدىمەكەننىڭ دامۋىنا اتسالىسىپ جۇرگەن بەلسەندى ازاماتتارعا العىسىن جەتكىزدى.
