قازاقستاننىڭ «اق جول» دەموكراتيالىق پارتياسىنىڭ اتىنان سايلانعان قر پارلامەنتى ءماجىلىسىنىڭ دەپۋتاتتارى ازات پەرۋاشەۆ پەن قازىبەك يسا شىمكەنت قالاسىنا جۇمىس ساپارىمەن كەلدى.
حالىق قالاۋلىلارى جاڭادان سالىنىپ جاتقان «جۇلدىز» يندۋستريالدى ايماعىندا بولىپ، جۇمىس بارىسىمەن تانىستى. اۋماعى 306 گەكتاردى قۇرايتىن بۇل ايماققا قازىر مەملەكەتتىك بيۋدجەتتىڭ ەسەبىنەن 6,5 ميلليارد تەڭگەگە ينفراقۇرىلىم جانە ينجينەرلىك-كوممۋنيكاتسيالىق جەلىلەر تارتىلىپ جاتىر. قازىردىڭ وزىندە 10 كومپانيا وسى ايماقتا ءوز كاسىپورىندارىن اشۋعا كىرىسكەن. بولاشاعى 230 ميلليارد تەڭگە ينۆەستيتسيا تارتا وتىرىپ، 50-دەن استام زاۋىت-فابريكا اشۋ جوسپارلانعان. يندۋستريالدى ايماق تولىق قۋاتىمەن جۇمىس ىستەي باستاعان كەزدە مۇندا 5 مىڭ ادام جۇمىسپەن قامتىلادى دەپ جوسپارلانعان.
–قاڭتارداعى وقيعالاردىڭ نەگىزگى سەبەبى – جۇمىسسىزدىق، كەدەيلىك پەن بولاشاققا دەگەن سەنىمنىڭ بولماۋى. جاستاردىڭ ەرتەڭگى كۇننەن ءۇمىتى بار بولسا، لاڭكەستىك ۇيىمداردىڭ ارانداتۋىنا ەرىپ، جاپپاي بۇزاقىلىققا بارماس ەدى. سول سەبەپتى تەزدەتىپ ءوندىرىستى دامىتىپ، جاستارعا تۇراقتى جۇمىس ورىندارىن ۇسىنۋىمىز كەرەك. وڭىرلەردە وسى جۇمىستىڭ قالاي ءجۇرىپ جاتقانىن، تاۋار وندىرۋشىلەر قانداي پروبلەمالارمەن بەتپە بەت كەلىپ وتىرعانىن ءبىلۋ ماقساتىندا كەلدىك، – دەدى ازات پەرۋاشەۆ.
مۇنان كەيىن دەپۋتاتتار «وڭتۇستىك» ارنايى ەكونوميكالىق ايماعىندا دا بولىپ، «شىمكەنت حيميالىق كومپانياسى» جشس-ءىنىڭ مەتيلترەتبۋتيل ەفيرىن وندىرەتىن زاۋىتىنىڭ جۇمىسىمەن دە تانىستى.
