پرەزيدەنت قاسىم-جومارت توقاەۆ "اكە تۋرالى وي-تولعاۋ" كىتابىنىڭ جەلىسىمەن كينو تۇسىرىلۋىنە قاتىستى پىكىر ءبىلدىردى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
"مەنىڭ كىتابىمداعى وقيعالاردىڭ نەگىزىندە كينو تۇسىرگەلى جاتقانىن وقىدىم. بۇل تۋرالى ەشكىمگە ەشقانداي تاپسىرما بەرگەن جوقپىن. بەرمەيمىن دە. مۇندايدى قالامايمىن. بىراق ءوزىم جازعان "اكە تۋرالى وي-تولعاۋ" كىتابىنان باس تارتپايمىن، مازمۇندى تۋىندى دەپ ەسەپتەيمىن. سەبەبى جاستارعا دا پايدالى دۇنيە. بۇل - مەنىڭ اكە-شەشە الدىنداعى پەرزەنتتىك بورىشىم", - دەدى ول.
سونداي-اق، ەلباسىنىڭ تۇلعاسىنا ارنالعان "ول تاريحتى جاساپ جاتىر" اتتى تۋىندىسى تۋرالى ايتىپ، "سول كىتاپتى جازعانىڭىزعا وكىنبەيسىز بە" دەگەن سۇراققا جاۋاپ بەردى.
"وكىنبەيمىن. تۇڭعىش پرەزيدەنتىمىزدىڭ ەڭبەگى تۋرالى كىتاپقا كەلسەك، قازاقتا "وتكەن ىسكە وكىنبە" دەگەن ءسوز بار. مەن كوپتەگەن وقيعاعا كۋا بولعان اداممىن. سوندىقتان، قاعازعا تۇسىرگەندى ءجون كوردىم. وقىرمانداردىڭ پىكىرىنشە، كىتاپتارىم جوعارى دەڭگەيدە جازىلعان. مىسالى، ءالى كۇنگە دەيىن ستۋدەنتتەر مەنىڭ كىتاپتارىمنان قاجەتى ماعلۇماتىن الىپ، پايدالانىپ ءجۇر. جوسپار تۋرالى ايتساق، كەيبىر ويلارىمدى ءتۇرتىپ قويىپ، كۇندەلىك جازاتىنىم بار. مۇمكىن بولاشاقتا قاجەت بولار. كەلەشەكتە قازىرگى ءومىرىمىز تۋرالى اۋقىمدى كىتاپ جازۋ ويىمدا بار. اماندىق بولسا جازامىن", - دەدى پرەزيدەنت.
“ادىرنا” ۇلتتىق پورتالى
