Prezıdent Qasym-Jomart Toqaev "Áke týraly oı-tolǵaý" kitabynyń jelisimen kıno túsirilýine qatysty pikir bildirdi, - dep habarlaıdy “Adyrna” ulttyq portaly Tengrinews.kz saıtyna silteme jasap.
"Meniń kitabymdaǵy oqıǵalardyń negizinde kıno túsirgeli jatqanyn oqydym. Bul týraly eshkimge eshqandaı tapsyrma bergen joqpyn. Bermeımin de. Mundaıdy qalamaımyn. Biraq ózim jazǵan "Áke týraly oı-tolǵaý" kitabynan bas tartpaımyn, mazmundy týyndy dep esepteımin. Sebebi jastarǵa da paıdaly dúnıe. Bul - meniń áke-sheshe aldyndaǵy perzenttik boryshym", - dedi ol.
Sondaı-aq, Elbasynyń tulǵasyna arnalǵan "Ol tarıhty jasap jatyr" atty týyndysy týraly aıtyp, "sol kitapty jazǵanyńyzǵa ókinbeısiz be" degen suraqqa jaýap berdi.
"Ókinbeımin. Tuńǵysh Prezıdentimizdiń eńbegi týraly kitapqa kelsek, qazaqta "Ótken iske ókinbe" degen sóz bar. Men kóptegen oqıǵaǵa kýá bolǵan adammyn. Sondyqtan, qaǵazǵa túsirgendi jón kórdim. Oqyrmandardyń pikirinshe, kitaptarym joǵary deńgeıde jazylǵan. Mysaly, áli kúnge deıin stýdentter meniń kitaptarymnan qajeti maǵlumatyn alyp, paıdalanyp júr. Jospar týraly aıtsaq, keıbir oılarymdy túrtip qoıyp, kúndelik jazatynym bar. Múmkin bolashaqta qajet bolar. Keleshekte qazirgi ómirimiz týraly aýqymdy kitap jazý oıymda bar. Amandyq bolsa jazamyn", - dedi Prezıdent.
“Adyrna” ulttyq portaly
