بۇگىن قر پارلامەنتى ءماجىلىسىنىڭ دەپۋتاتى جاناربەك ءاشىمجان تالدىقورعان قالاسىندا «قاڭتار وقيعاسىنا» بايلانىستى قامالعاندارمەن، ولاردىڭ تۋىستارىمەن كەزدەستى.
كەزدەسۋگە 150-گە جۋىق اتا-انا مەن قامالعانداردىڭ تۋىستارى كەلدى. ولار دەپۋتاتقا تەرگەۋ يزولياتورىنىڭ باسشىلارىمەن كەزدەستىرۋدى، سونداي-اق، قاماۋ ورنىنا كىرىپ، ماسەلەنى ءوز كوزىمەن كورۋگە شاقىردى. ۇسىنىستى قابىل العان ءماجىلىس دەپۋتاتى تەرگەۋ يزولياتورىنا كىرىپ، قاماۋداعى 93 ادامنىڭ ارقايسىمەن جەكە سويلەسىپ، بارلىق ۇسىنىس، ارىز-شاعىمدارىن تىڭدادى. سونداي-اق ونىڭ قورىتىندىسى بويىنشا اتا-انالارىنا جەكە-جەكە اقپارات بەردى. ال ەرتەڭ تەرگەۋ يزولياتورىنىڭ باسشىسى قامالعانداردىڭ تۋىستارىمەن تاعى كەزدەسىپ، اقپارات بەرەدى.
كەزدەسۋگە ءماجىلىس دەپۋتاتىمەن بىرگە الماتى وبلىسى پروكۋراتۋراسىنىڭ ارنايى پروكۋرورلار باسقارماسىنىڭ باستىعى ەرمەك جاقسىباەۆ، الماتى وبلىسى پروكۋرورىنىڭ ورىنباسارى ءىلياس بەسكەمپىروۆ، الماتى وبلىسى ىشكى ساياسات باسقارماسىنىڭ باسشىسى بولات كەرىمبەك، «Nur Otan» پارتياسى الماتى وبلىستىق فيليالى توراعاسىنىڭ ورىنباسارى، ساياسي كەڭەس بيۋروسىنىڭ مۇشەسى سەرىك نۇرقادىروۆ قاتىستى.
ءماجىلىس دەپۋتاتى كەزدەسۋ قورىتىندىسى بويىنشا جۇرتشىلىققا كەڭىرەك اقپارات بەرەتىنى تۋرالى حابارلادى.
قر ءىىم مالىمەتى بويىنشا جاپپاي تارتىپسىزدىك كەزەڭىندە الماتى وبلىسىندا قىلمىس جاسادى دەگەن كۇدىكپەن 116 ادام ۇستالعان. ونىڭ ىشىندە 44 ادامعا قاتىستى كۇزەتپەن ۇستاۋ تۇرىندەگى بۇلتارتپاۋ شاراسى قولدانىلىپ، 9 ادام بوساتىلعان.
قازىرگى كەزدە 93 ادام قالالىق تەرگەۋ يزولياتورىندا قاماۋدا. وبلىستىق پوليتسيا دەپارتامەنتىنىڭ وندىرىسىندە 390 قىلمىستىق ءىس بار.
ازاپتاۋلار تۋرالى ءاربىر شاعىمعا ىشكى ىستەر ءمينيسترىنىڭ تاپسىرماسى بويىنشا پروكۋراتۋرا ورگاندارىمەن قاتار ءىىم-ءنىڭ وزىندىك قاۋىپسىزدىك ورگاندارى ءجىتى تەكسەرۋدە. قانداي دا ءبىر قۇقىقتار بۇزىلعان جاعدايدا، ازاماتتار باس پروكۋراتۋرانىڭ كولل-ورتالىعىنا 115 تەلەفونى ارقىلى حابارلاسا الادى.
جالپى وبلىس بويىنشا «قاڭتار وقيعاسى» كەزىندە 758 ادام زارداپ شەككەن، ونىڭ ىشىندە 643-ءى پوليتسيا قىزمەتكەرى، 78-ءى اسكەريلەر، 37-ءسى بەيبىت تۇرعىن. 8 اكىمشىلىك عيمارات، 68 قىزمەتتىك كولىك زاقىمداندى، ونىڭ 7-ەۋى تولىعىمەن جانىپ كەتكەن، سونداي-اق 512 قارۋ ۇرلانعان.
“ادىرنا” ۇلتتىق پورتالى
