Bügın QR Parlamentı Mäjılısınıŋ deputaty Janarbek Äşımjan Taldyqorǧan qalasynda «Qaŋtar oqiǧasyna» bailanysty qamalǧandarmen, olardyŋ tuystarymen kezdestı.
Kezdesuge 150-ge juyq ata-ana men qamalǧandardyŋ tuystary keldı. Olar deputatqa tergeu izoliatorynyŋ basşylarymen kezdestırudı, sondai-aq, qamau ornyna kırıp, mäselenı öz közımen köruge şaqyrdy. Ūsynysty qabyl alǧan Mäjılıs deputaty tergeu izoliatoryna kırıp, qamaudaǧy 93 adamnyŋ ärqaisymen jeke söilesıp, barlyq ūsynys, aryz-şaǧymdaryn tyŋdady. Sondai-aq onyŋ qorytyndysy boiynşa ata-analaryna jeke-jeke aqparat berdı. Al erteŋ tergeu izoliatorynyŋ basşysy qamalǧandardyŋ tuystarymen taǧy kezdesıp, aqparat beredı.
Kezdesuge mäjılıs deputatymen bırge Almaty oblysy prokuraturasynyŋ Arnaiy prokurorlar basqarmasynyŋ bastyǧy Ermek Jaqsybaev, Almaty oblysy prokurorynyŋ orynbasary Iliias Beskempırov, Almaty oblysy ışkı saiasat basqarmasynyŋ basşysy Bolat Kerımbek, «Nur Otan» partiiasy Almaty oblystyq filialy töraǧasynyŋ orynbasary, Saiasi keŋes Biurosynyŋ müşesı Serık Nūrqadyrov qatysty.
Mäjılıs deputaty kezdesu qorytyndysy boiynşa jūrtşylyqqa keŋırek aqparat beretını turaly habarlady.
QR IIM mälımetı boiynşa jappai tärtıpsızdık kezeŋınde Almaty oblysynda qylmys jasady degen küdıkpen 116 adam ūstalǧan. Onyŋ ışınde 44 adamǧa qatysty küzetpen ūstau türındegı būltartpau şarasy qoldanylyp, 9 adam bosatylǧan.
Qazırgı kezde 93 adam qalalyq tergeu izoliatorynda qamauda. Oblystyq Polisiia departamentınıŋ öndırısınde 390 qylmystyq ıs bar.
Azaptaular turaly ärbır şaǧymǧa Işkı ıster ministrınıŋ tapsyrmasy boiynşa prokuratura organdarymen qatar IIM-nıŋ Özındık qauıpsızdık organdary jıtı tekserude. Qandai da bır qūqyqtar būzylǧan jaǧdaida, azamattar Bas prokuraturanyŋ koll-ortalyǧyna 115 telefony arqyly habarlasa alady.
Jalpy oblys boiynşa «Qaŋtar oqiǧasy» kezınde 758 adam zardap şekken, onyŋ ışınde 643-ı polisiia qyzmetkerı, 78-ı äskeriler, 37-sı beibıt tūrǧyn. 8 äkımşılık ǧimarat, 68 qyzmettık kölık zaqymdandy, onyŋ 7-euı tolyǧymen janyp ketken, sondai-aq 512 qaru ūrlanǧan.
“Adyrna” ūlttyq portaly
