ەندىگى جەردە اكىمدەر حالىقپەن بۇرىنعىداي جىلىنا ءبىر رەت قانا كەزدەسپەيدى. جىل بويىنا شاعىن اۋداندار، ەلدى مەكەندەر مەن تۇرعىن الاپتاردى ارالاپ، تۇرعىندارمەن كەزدەسۋ وتكىزەدى. وندا كوتەرىلگەن ماسەلەلەر جيناقتالىپ، وزەكتى پروبلەمالاردىڭ پۋلى جاساقتالادى. ءسويتىپ، تۇرعىنداردى مازالايتىن ەڭ ماڭىزدى ماسەلەلەر جۇيەلى تۇردە شەشىلىپ وتىرادى.
بۇگىن قالالىق ءماسليحاتتىڭ كەزەكتى ون ءۇشىنشى سەسسياسىندا دەپۋتاتتار شىمكەنت قالاسى اكىمى مەن اۋدان اكىمدەرىنىڭ تۇرعىندارمەن كەزدەسۋلەرىنىڭ كەستەسىن بەكىتتى. وسىلايشا جەرگىلىكتى بيلىك حالىقپەن كەرى بايلانىسىن كۇشەيتىپ، ەلگە ەتەنە بولا ءتۇسۋدى كوزدەپ وتىر.
سەسسيادا تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ ماسەلەسى بويىنشا شىمكەنت قالالىق توتەنشە جاعدايلار دەپارتامەنتىنىڭ باستىعى ماديار جاقسىباەۆتىڭ ەسەبى تىڭدالدى. ونىڭ ايتۋىنشا، بيىل قالا اۋماعىندا 5 وزەن مەن كانالداردىڭ ارناسى تازالانىپ، جاعلاۋى بەكەمدەلەدى. دەپۋتاتتاردىڭ ۇسىنىسى بويىنشا، بادام وزەنىنىڭ جاعالاۋىن بەكەمدەۋ جانە اقساي-قاراباستاۋ كانالىن كۇردەلى جوندەۋدەن وتكىزۋ ءۇشىن بيىل جوبالىق-سمەتالىق قۇجاتتار ازىرلەنەدى.
مۇنان بولەك سەسسيا بارىسىندا حالىقتىڭ الەۋمەتتىك وسال توپتارىنا قولداۋ كورسەتۋ جانە جۇمىسپەن قامتۋ، مەملەكەتتىك-جەكەمەنشىك ارىپتەستىك جوبالارى بويىنشا مىندەتتەمەلەردى قابىلداۋ تۋرالى شەشىمگە وزگەرىس ەنگىزۋ، قالا اكىمدىگى جانىنداعى كوميسسيالاردىڭ قۇرامىنا وزگەرىس ەنگىزۋ جانە وزگە دە ماسەلەلەر قارالىپ، ءتيىستى شەشىمدەر قابىلدادى.
ايتا كەتەيىك، سەسسيا جۇمىسىن شىمكەنت قالاسى ءماسليحاتىنىڭ حاتشىسى باحادىر نارىمبەتوۆ جۇرگىزدى. سەسسياعا قالا اكىمى مۇرات ايتەنوۆ قاتىسىپ، قورتىندى ءسوز سويلەدى. شاھار باسشىسى قالانىڭ الەۋمەتتىك-ەكونوميكالىق دامۋىنا قاتىستى ماڭىزدى شەشىمدەر قابىلداعانى ءۇشىن ءماسليحات دەپۋتاتتارىنا العىسىن ءبىلدىردى.
