Endigi jerde ákimder halyqpen burynǵydaı jylyna bir ret qana kezdespeıdi. Jyl boıyna shaǵyn aýdandar, eldi mekender men turǵyn alaptardy aralap, turǵyndarmen kezdesý ótkizedi. Onda kóterilgen máseleler jınaqtalyp, ózekti problemalardyń pýly jasaqtalady. Sóıtip, turǵyndardy mazalaıtyn eń mańyzdy máseleler júıeli túrde sheshilip otyrady.
Búgin qalalyq máslıhattyń kezekti on úshinshi sessııasynda depýtattar Shymkent qalasy ákimi men aýdan ákimderiniń turǵyndarmen kezdesýleriniń kestesin bekitti. Osylaısha jergilikti bılik halyqpen keri baılanysyn kúsheıtip, elge etene bola túsýdi kózdep otyr.
Sessııada tabıǵı jáne tehnogendik sıpattaǵy tótenshe jaǵdaılardyń aldyn alý máselesi boıynsha Shymkent qalalyq tótenshe jaǵdaılar departamentiniń bastyǵy Madııar Jaqsybaevtyń esebi tyńdaldy. Onyń aıtýynsha, bıyl qala aýmaǵynda 5 ózen men kanaldardyń arnasy tazalanyp, jaǵlaýy bekemdeledi. Depýtattardyń usynysy boıynsha, Badam ózeniniń jaǵalaýyn bekemdeý jáne Aqsaı-Qarabastaý kanalyn kúrdeli jóndeýden ótkizý úshin bıyl jobalyq-smetalyq qujattar ázirlenedi.
Munan bólek sessııa barysynda halyqtyń áleýmettik osal toptaryna qoldaý kórsetý jáne jumyspen qamtý, memlekettik-jekemenshik áriptestik jobalary boıynsha mindettemelerdi qabyldaý týraly sheshimge ózgeris engizý, qala ákimdigi janyndaǵy komıssııalardyń quramyna ózgeris engizý jáne ózge de máseleler qaralyp, tıisti sheshimder qabyldady.
Aıta keteıik, sessııa jumysyn Shymkent qalasy máslıhatynyń hatshysy Bahadyr Narymbetov júrgizdi. Sessııaǵa qala ákimi Murat Áıtenov qatysyp, qortyndy sóz sóıledi. Shahar basshysy qalanyń áleýmettik-ekonomıkalyq damýyna qatysty mańyzdy sheshimder qabyldaǵany úshin máslıhat depýtattaryna alǵysyn bildirdi.
