قازىرگى كەزەڭدە ساپالى ۇلت قالىپتاستىرۋ ءۇشىن ازاماتتاردى سپورتپەن شۇعىلدانۋعا باۋلۋ – اسا ماڭىزدى مىندەتتىڭ ءبىرى. بۇل رەتتە وڭىرلەردە بۇقارالىق سپورتتى دامىتۋ دەڭگەيىن كوتەرۋ وزەكتى. سىر ەلىندە بۇل كورسەتكىش بۇگىنگى كۇنى 34 پايىزدى قۇرادى، ياعني 280 مىڭنان استام وبلىس تۇرعىنى سپورتتىڭ جاپپاي تۇرلەرىمەن اينالىسۋدا. الداعى ۋاقىتتا وسى كورسەتكىشتى 38 پايىزعا جەتكىزۋ قاجەت.
بۇگىن وبلىس اكىمى گۇلشارا ابدىقالىقوۆاعا وبلىستىق دەنە شىنىقتىرۋ جانە سپورت باسقارماسىنىڭ باسشىسى اسىلجان جامانقۇلوۆ سالالىق ماسەلەلەردەگى نەگىزگى باسىمدىقتار بويىنشا اتقارىلعان جۇمىستاردى باياندادى.
قازىردە وڭىردەگى 21 سپورت مەكتەبىندە 21 161 بالا مەن ءجاسوسپىرىم 48 سپورت ءتۇرى بويىنشا جاتتىعادى. وتكەن جىلى حالىقتى سپورتتىق ينفراقۇرىلىممەن قامتۋ ۇلەسى 41,6 پايىزعا جەتكەن. سونداي-اق، مەملەكەتتىك-جەكەمەنشىك ارىپتەستىك اياسىندا سپورت سالاسى بويىنشا 6 جوبا ىسكە استى. وسى جۇمىستاردىڭ ناتيجەسىندە قىزىلوردالىق 188 سپورتشى الەم چەمپيوناتتارىندا جۇلدەگەر اتانىپ، 131 سپورتشى ازيا چەمپيوناتتارىندا مەدال جەڭىپ العان.
اسىلجان جامانقۇلوۆ مەملەكەتتىك سپورتتىق تاپسىرىس شەڭبەرىندەگى جوبالارعا دا توقتالدى. وتكەن جىلى وسى باعىتتا 212 ملن. تەڭگە ءبولىنىپ، 2 156 بالا تەگىن سپورت ۇيىرمەلەرگە تارتىلسا، بيىل مەملەكەتتىك تاپسىرىس كولەمى 638 ملن. تەڭگەگە دەيىن ۇلعايىپ، 4 312 بالانى قامتۋ جوسپارلانعان.
سونداي-اق، ول جاز مەزگىلىندە قىتايدا وتەتىن ازيا ويىندارىنا سپورتشىلاردى باپتاۋ جانە دايىندىق شارالارى باستالعانىن تىلگە تيەك ەتتى.
سپورت سالاسىنداعى جۇمىستاردى سارالاعان ايماق باسشىسى بۇقارالىق جانە بالالار سپورتىن كۇشەيتۋ ءۇشىن ءاربىر جوبانىڭ بالالارعا تيىمدىلىگى ەسكەرىلىپ، سپورتتىق تاپسىرىستىڭ ادىلەتتى ءبولىنۋىن قاداعاۋ ماڭىزدى ەكەنىن قاپەرگە سالدى. اسىرەسە، «بالالار جىلى» اياسىندا دارىندى بالالارعا قولداۋ كورسەتىپ، سپورتپەن كاسىبي تۇردە اينالىساتىن جەتكىنشەكتەرگە ەرەكشە كوڭىل بولۋ كەرەكتىگىن ەسكەرتتى. سونداي-اق، مەملەكەتتىك-جەكەمەنشىك ارىپتەستىك اياسىندا سپورت نىساندارىن سالۋ، دەمەۋشىلەرمەن تۇراقتى جۇمىس جۇرگىزۋدى ءارى قاراي ىلگەرىلەتۋ قاجەت دەدى.
