شىمكەنتتە تۇرعىنداردى ساپالى ەلەكتر ەنەرگياسىمەن قامتاماسىز ەتۋ جۇمىستارى جالعاسۋدا. بۇگىن قالالىق ەنەرگەتيكا جانە ينفراقۇرىلىمدى دامىتۋ باسقارماسىنىڭ وكىلدەرى باق وكىلدەرىن اتقارىلىپ جاتقان جۇمىس بارىسىمەن تانىستىردى.
سونىڭ ءبىرى – اسار-2 شاعىناۋدانىن ساپالى ەلەكتر قۋاتىمەن قامتۋ بويىنشا جالپى سانى 2 139 ەلەكتر باعاناسى ورناتىلدى. بۇعان قوسا 24 ترانسفورماتور ساتىپ الىنىپ، ۋچاسكە باسىنا جەتكىزىلگەن. 30 شاقىرىم ەلەكتر جەلىسى تارتىلىپ، ناتيجەسىندە 2700 ءۇي ەلەكتر جارىعىمەن قامتىلدى.
– مەملەكەت باسشىسىنىڭ تاپسىرماسىمەن قالا تۇرعىندارىن ساپالى ەلەكتر ەنەرگياسىمەن قامتاماسىز ەتۋ جۇمىستارى قالا اكىمى مۇرات ايتەنوۆتىڭ باقىلاۋىمەن جۇزەگە اسىرىلۋدا. 2021 جىلى «بوزارىق» جانە «1-م-1» قوسالقى ستانتسيالارىنىڭ قۇرىلىس اياقتالىپ، پايدالانۋعا بەرىلدى. شاعىناۋداندار مەن ەلدىمەكەندەرگە ەلەكتر جەلىلەرىن تارتۋ سول قوسالقى ستانتسيالار ىسكە قوسىلعان سوڭ مۇمكىن بولىپ وتىر. اسار-2 شاعىناۋدانىمەن قوسا قايناربۇلاق تۇرعىندارى دا بيىل ساپالى ەلەكتر جارىعىنا قول جەتكىزەدى، – دەدى باسقارما باسشىسى بورانباي بۋلاتبەكوۆ.
بۇگىنگى تاڭدا قايناربۇلاق تۇرعىن الابىنىڭ شەت جاعىنا دا باعانالار ورناتىلۋدا. مەردىگەر «Turan Energo Group» مەكەمەسىنىڭ ماماندارى ءتيىستى 3280 باعاعانىڭ 3000-نان استامىن ورناتىپ قويعان.