22 اقپاندا تەرگەۋ سوتى قازاقستاننىڭ بۇرىنعى قورعانىس ءمينيسترى مۇرات بەكتانوۆقا قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىنا سانكتسيا بەردى،دەپ حابارلايدى "ادىرنا" ۇلتتىق پورتالى.
بەكتانوۆ 20 اقپاندا ۇستالدى. ول قاڭتار وقيعاسى كەزىندەگى «ارەكەتسىزدىكتەرى» ءۇشىن ايىپتالىپ وتىر. مۇرات بەكتانوۆ قازاقستان پرەزيدەنتى قاسىم-جومارت توقاەۆتىڭ جارلىعىمەن 2021 جىلدىڭ تامىزىندا جامبىل وبلىسىنداعى اسكەري قويمادا بولعان جارىلىستان كەيىن قورعانىس ءمينيسترى بولىپ تاعايىندالدى. بەكتانوۆ قورعانىس مينيسترلىگىن ءتورت اي بويى باسقاردى.
بيىلعى جىلدىڭ 19 قاڭتارىندا توقاەۆ بەكتانوۆتى قاڭتار وقيعاسى كەزىندە «قولباسشىلىق قاسيەتىن كورسەتپەدى» دەپ قىزمەتىنەن بوساتتى. سول كۇنى پارلامەنتتىڭ تومەنگى پالاتاسى بۇرىنعى پرەزيدەنت نۇرسۇلتان نازارباەۆتىڭ قازاقستان قاۋىپسىزدىك كەڭەسى مەن قازاقستان حالقى اسسامبلەياسىن ءومىر بويىنا توراعالىق ەتۋ قۇقىعىن الىپ تاستايتىن زاڭناماعا ەكس-پوست-فاكتو تۇزەتۋلەردى ماقۇلدادى.
ماڭعىستاۋ وبلىسىنىڭ جاڭاوزەن قالاسىندا قاڭتار ايىنىڭ باسىندا سۇيىتىلعان گاز باعاسىنىڭ شارىقتاۋىنان تۋىنداعان نارازىلىق شارالارى ەلدىڭ باسقا ايماقتارىنا، الماتى سياقتى بىرقاتار قالالارعا تەز تارالىپ، قانتوگىسكە ۇلاستى. رەسمي تۇردە 227 ادام قازا تاپتى، ونىڭ ىشىندە 19 قاۋىپسىزدىك قىزمەتكەرى اجال قۇشتى.
قاڭتارداعى شەرۋشىلەردىڭ نارازىلىعى نەگىزىنەن ەكس-پرەزيدەنت نۇرسۇلتان نازارباەۆتىڭ ساياسي مۇراسىنا، تولىق جەمقورلىق پەن ادىلەتسىزدىككە قارسى بولدى. كوپشىلىك نازارباەۆ 2019 جىلى وتستاۆكاعا كەتىپ، پرەزيدەنتتىك قىزمەت ونىڭ پروتەگەتى قاسىم-جومارت توقاەۆقا اۋىسقاننان كەيىن دە مەملەكەتتىك اپپاراتقا ىقپالىن جالعاستىرعانىن ايتتى.
"ادىرنا" ۇلتتىق پورتالى
