قازاقستان اۆتوبيزنەس قاۋىمداستىعىنىڭ ۆيتسە-پرەزيدەنتى انار ماقاشەۆا كادەگە جاراتۋ الىمى مولشەرلەمەسىنىڭ 50 پايىزعا تومەندەتىلەتىندىگىنە قاتىستى پىكىر ءبىلدىردى، دەپ حابارلايدى قازاقپارات.
«قاۋىمداستىق قۇرامىنا رەسمي وندىرۋشىلەرمەن قاتار كولىك قۇرالىن يمپورتتاۋشىلار دا كىرەدى.
وندىرۋشىلەر ءۇشىن احۋال ەش وزگەرمەيدى. ويتكەنى، كولىك قۇرامىنىڭ قۇنىنا كادەگە جاراتۋ الىمى قوسىلماعان. وندىرۋشىلەرىمىز دە زاڭناماعا ساي كادەگە جاراتۋ الىمىن تولەۋگە كەلىسەدى. ولار دا كادەگە جاراتۋ الىمىن تولەۋشىلەر سانالادى. ودان كەيىن كادەگە جاراتۋ الىمى قاراجاتىن جيناۋمەن اينالىساتىن وپەراتور ءدال سول سومانى سوڭعى تۇتىنۋشىعا ۋتيلالىم تولەمى قوسىلماۋى ءۇشىن قايتارىپ بەرەدى»، - دەپ اتاپ وتەدى قاۋىمداستىق وكىلى.
سونىمەن قاتار، انار ماقاشەۆا ۋتيل الىمىنان تۇسكەن قاراجاتتىڭ جەڭىلدىكپەن، جىلدىق 4 پايىز مولشەرلەمەمەن جەڭىلدەتىلگەن نەسيە بەرۋ باعدارلاماسىنا جۇمسالاتىندىعىنا توقتالىپ، مۇنىڭ ورىندى شەشىم ەكەنىن اتاپ ءوتتى.
« ويتكەنى، قازاقستان نارىعىنداعى جاڭا كولىك ساتىپ الۋعا قاتىستى ورتاشا مولشەرلەمە شامامەن 17-25, ءتىپتى كەيبىر كومپانيالاردا 40 پايىزعا دەيىن جەتەدى. ال جىلدىق 4 پايىزدىق مولشەرلەمە - جاڭعا كولىك ساتىپ الۋ ءۇشىن قولجەتىمدى قارجىلىق باعدارلاما. بۇل ءتىپتى ءبولىپ تولەۋدەن دە الدەقايدا جاقسى»،- دەدى ول.
”ادىرنا” ۇلتتىق پورتالى
