جامبىل وبلىسىنداعى بايزاق، جامبىل، ت.رىسقۇلوۆ جانە شۋ اۋداندارىندا دالا جۇمىستارى باستالىپ كەتتى. جوسپارداعى 101,9 مىڭ گەكتاردىڭ 2,1 مىڭ گەكتارىندا ايداۋ جۇمىستارى باستالسا، 2,1 مىڭ گەكتار القاپ دايىندالۋ ۇستىندە. سونداي-اق، ت.رىسقۇلوۆ اۋدانىندا 545 گەكتار القاپقا جازدىق ماساقتى داقىلدار سەبىلگەن.
بۇل تۋرالى وكق ءباسپاسوز بريفينگىندە جامبىل وبلىسى اكىمدىگى اۋىل شارۋاشىلىعى باسقارماسىنىڭ باسشىسى ەربول جيەنقۇلوۆ مالىمدەدى. كوكتەمگى دالا جۇمىستارىنا قاجەتتى 77,9 مىڭ توننا تۇقىم تولىقتاي دايىن. وڭىردە سوڭعى 2 جىلدا ەگىس القابىنا ساپاسى تەكسەرىلگەن جوعارى رەپرودۋكتسيالى تۇقىمدار مەن I-II-III رەپرودۋكتسيالى تۇقىمدار ەگىلىپ، ناتيجەسىندە وندىرىلگەن ءونىمنىڭ ساپاسى دا ارتىپ كەلەدى ەكەن.
«كوكتەمگى دالا جۇمىستارىنا 7 317 دانا اۋىل شارۋاشىلىعى تەحنيكاسى قاتىسادى. بيىل شارۋاشىلىقتارعا اقپان-مامىر ايلارىنا جالپى 10 920 توننا كەپىلدەندىرىلگەن ديزەل وتىنى 194-208 تەڭگە ارالىعىندا بولىنۋدە. اعىمداعى جىلى 52,4 مىڭ توننا مينەرالدى تىڭايتقىشتى ەگىستىك القاپقا سەبىلىپ، 46,6 %-عا تىڭايتۋ جوسپارلانۋدا. بۇگىنگى كۇنگە 59 شارۋاشىلىق تاراپىنان تۇسكەن وتىنىمگە سايكەس «اگرارلىق نەسيە كورپوراتسياسىمەن» كوكتەمگى دالا جۇمىستارىنا بەرىلەتىن نەسيە كولەمى 437,1 ملن تەڭگەگە جەتتى. اعىن سۋدى ءتيىمدى پايدالانۋ جانە سۋارمالى سۋدىڭ ىسىرابىن ازايتۋ ماقساتىندا سۋ ۇنەمدەۋ تەحنولوگيالارى 2020 جىلى 30,0 مىڭ گەكتار ەگىس الاڭىنا ەندىرىلگەن بولسا، بىلتىر 40,5 مىڭ گەكتارعا جەتكىزىلدى. كەلەسى جىلى 50,0 مىڭ گەكتارعا جەتكىزىلەدى»، – دەپ ۋادە بەردى باسقارما باسشىسى.
سپيكەردىڭ ايتۋىنشا، بۇل رەتتە سۋ ۇنەمدەۋ تەحنولوگيالار كولەمىن ۇلعايتۋ ماقساتىندا 2022-2030 جىلدارى 52,0 مىڭ گەكتارعا «Valley» كومپانياسىنىڭ 1000 دانا جاڭبىرلاتىپ سۋارۋ قوندىرعىلارىن ليزينگكە بەرۋ ارقىلى ەندىرۋ كوزدەلۋدە. اتالعان كومپانيا تاراپىنان بيىل 50 جاڭبىرلاتقىش قوندىرعىسىن 2,6 مىڭ گەكتار القاپقا ورناتىلاتىن بولادى.
