جامبىل وبلىسىندا وڭدەۋ ونەركاسىبىن جانە وتاندىق ماشينا جاساۋ سالاسىن دامىتۋعا باعىتتالعان ستراتەگيالىق ماڭىزى زور ەكى جوبا باستاۋ الدى. وڭىردە قانت زاۋىتى مەن اۋىل شارۋاشىلىعى تەحنيكاسىن شىعاراتىن زاۋىتتىڭ قۇرىلىسى قولعا الىندى.
بۇل باستامالار شارۋالاردى زاماناۋي تەحنيكامەن قامتىپ، اۋىل شارۋاشىلىعى ونىمدەرىن تەرەڭ وڭدەۋگە جول اشادى. مۇنداي قادامدار مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايقىنداعان ستراتەگيالىق مىندەتتەرمەن تولىق سايكەس كەلەدى.
بايزاق اۋدانىندا قازاقستان تاۋەلسىزدىك العاننان بەرى العاش رەت قانت زاۋىتىنىڭ قۇرىلىسى باستالدى. جوبانىڭ ينۆەستيتسيالىق كولەمى شامامەن 200 ملن اقش دوللارىن قۇرايدى. كاسىپورىن جىلىنا 1 ميلليون توننا قانت قىزىلشاسىن قايتا وڭدەپ، 120 مىڭ تونناعا جۋىق قانت وندىرۋگە قاۋقارلى بولادى. سونىمەن قاتار مەلاسسا مەن جوم سياقتى قوسالقى ونىمدەر دە شىعارىلادى. زاۋىتتا 350-دەن استام تۇراقتى جۇمىس ورنى اشىلادى.
بۇل كۇنى تاراز قالاسىنداعى يندۋستريالىق ايماقتا اۋىل شارۋاشىلىعى تەحنيكاسىن وندىرەتىن كاسىپورىننىڭ قۇرىلىسى باستالدى. جوبانىڭ جالپى قۇنى – 10 ملرد تەڭگە. زاۋىت ىسكە قوسىلعاننان كەيىن جىلىنا 2 مىڭعا دەيىن سان ءتۇرلى تراكتورلار مەن تىركەمەلى جابدىقتار شىعاراتىن بولادى. مۇندا 55 جاڭا جۇمىس ورنى قۇرىلادى.
بيىلعى جىلدىڭ سەگىز ايىندا وبلىستىڭ نەگىزگى كاپيتالىنا تارتىلعان ينۆەستيتسيا كولەمى 391,7 ملرد تەڭگەنى قۇراپ، وتكەن جىلدىڭ وسى كەزەڭىمەن سالىستىرعاندا 32,4 پايىزعا ارتتى.
مەملەكەت باسشىسىنىڭ قىتايعا ساپارى بارىسىندا جەل گەنەراتورلارىنا ارنالعان قوسالقى بولشەكتەر شىعاراتىن زاۋىتتىڭ العاشقى كەشەنى ىسكە قوسىلدى. ال قاراشا ايىندا جىلىنا 800 مىڭ توننا ءونىم بەرەتىن كۇكىرت قىشقىلى زاۋىتىنىڭ ءبىرىنشى كەزەڭى پايدالانۋعا بەرىلەدى دەپ جوسپارلانعان. بۇدان بولەك، وڭىردە جۇگەرىنى تەرەڭ وڭدەۋ زاۋىتى، مەتاللۋرگيالىق كەشەن جانە كالتسيلەنگەن سودا وندىرەتىن كاسىپورىننىڭ قۇرىلىسى ءجۇرىپ جاتىر. تەك وسى بەس ءىرى جوبانىڭ جالپى ينۆەستيتسيالىق كولەمى 1,5 ترلن تەڭگەدەن اسىپ وتىر.
– ءبىز ەل پرەزيدەنتىنىڭ تاپسىرمالارى ءسوز جۇزىندە ەمەس، ناقتى ىستەر ارقىلى ورىندالىپ جاتقانىن ايقىن كورىپ وتىرمىز. جامبىل وبلىسى ونەركاسىپ پەن وڭدەۋ سالاسىندا قولعا الىنعان ءىرى باستامالاردىڭ جۇزەگە اساتىن باستى ورتالىقتارىنىڭ بىرىنە اينالىپ كەلەدى، – دەدى ەربول قاراشوكەەۆ.
ۇقساس جاڭالىقتار
