جامبىل وبلىسىندا نۇرعيسا تىلەنديەۆ اتىنداعى مەكتەپ-ينتەرناتتا وقۋشىلاردىڭ قاتىسۋىمەن بولعان وقيعاعا قاتىستى بەينەجازبا الەۋمەتتىك جەلىدە تاراپ، قوعامدا ۇلكەن رەزونانس تۋدىردى، دەپ حابارلايدى "ادىرنا" ۇلتتىق پورتالى.
كادرلاردا ءبىر توپ ۇل بالانىڭ قىزدى اجەتحاناعا كۇشتەپ كىرگىزگەن ءساتى كورىنەدى. ايتا كەتەيىك، بۇل ينتەرنات كوپ بالالى جانە الەۋمەتتىك جاعدايى تومەن وتباسىلاردان شىققان بالالارعا ارنالعان.
وبلىستىق ءبىلىم باسقارماسىنىڭ مالىمەتىنشە، وقيعا 5 ءساۋىر كۇنى بولعان. انىقتاۋ جۇمىستارىنىڭ قورىتىندىسى بويىنشا مەكتەپ-ينتەرناتتىڭ بىرقاتار قىزمەتكەرلەرىنە تارتىپتىك جازا قولدانىلعان.
«اتالعان دەرەككە بايلانىستى ينتەرناتتىڭ بىرنەشە مامانى جاۋاپكەرشىلىككە تارتىلدى. سونداي-اق بولعان جاعدايدى قۇزىرلى ورگاندارعا دەر كەزىندە حابارلاماعانى ءۇشىن مەكەمە ديرەكتورىنا دا تارتىپتىك جازا بەرىلدى»، – دەلىنگەن رەسمي حابارلامادا.
سونىمەن قاتار، ءبىلىم باسقارماسى جامبىل وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنە مەكتەپ ديرەكتورىنىڭ ارەكەتىنە قاتىستى اكىمشىلىك ءىس قوزعاۋ تۋرالى ۇسىنىس جولداعان.
قازىرگى ۋاقىتتا پوليتسيا اتالعان دەرەككە قۇقىقتىق باعا بەرۋ ءۇشىن تەكسەرۋ جۇرگىزىپ جاتىر.
