پرەزيدەنتتىڭ باستاماسىمەن جاريالانعان "جۇمىسشى ماماندىقتارى جىلى" اياسىندا جامبىل پوليتەحنيكالىق جوعارى كوللەدجىنىڭ تۇلەكتەرىنە دەگەن سۇرانىس ايتارلىقتاي وسكەن. بۇعان دالەل، وقۋ ورنى ەڭبەك نارىعىنداعى ارىپتەستىگىن كەڭەيتىپ، كاسىپورىندارمەن جاسالعان مەموراندۋمدار سانىن 125-كە جەتكىزگەن. سونىڭ ناتيجەسىندە 2024-2025 وقۋ جىلىندا كوللەدجدى اياقتاعان 848 تۇلەكتىڭ 86 پايىزى جۇمىسقا ورنالاسۋعا مۇمكىندىك العان.
سونىمەن قاتار بۇگىندە كوللەدج وقۋ باعدارلاماسىنا بيزنەستىڭ سۇرانىسىنا بەيىمدەلگەن، تاجىريبەگە نەگىزدەلگەن ءبىلىم بەرۋ جۇيەسىن ەنگىزۋدە. بۇل تۋرالى وقۋ ورنىنىڭ ديرەكتورى اسحات كارتاكوۆ وڭىرلىك كوممۋنيكاتسيالار قىزمەتى ۇيىمداستىرعان ءباسپاسوز تۋرىندا ايتتى.
بۇگىندە كوللەدجدە 2 600-گە جۋىق ستۋدەنت 30-دان استام ماماندىق بويىنشا ءبىلىم الۋدا. ولاردىڭ ىشىندە 1 500-گە جۋىعى جۇمىسشى ماماندىقتار بويىنشا وقىپ ءجۇر. ەرەكشە اتاپ وتەرلىگى – ستۋدەنتتەردىڭ باسىم بولىگى دۋالدى وقىتۋ جۇيەسى نەگىزىندە دايىندالادى. بۇل جۇيە تەوريا مەن پراكتيكانى ءتيىمدى ۇيلەستىرۋگە مۇمكىندىك بەرەدى: وقۋ ۋاقىتىنىڭ 40%-ى كوللەدجدە، ال 60%-ى ناقتى ءوندىرىس ورىندارىندا وتەدى.
كوللەدجدىڭ تەحنيكالىق بازاسى دا جىل سايىن جاڭارتىلىپ كەلەدى. زاماناۋي زەرتحانالار، وندىرىستىك ترەناجەرلار، ينتەراكتيۆتى قۇرىلعىلار ستۋدەنتتەردىڭ كاسىبي دەڭگەيىن ارتتىرۋعا سەپ بولىپ وتىر. روبوتوتەحنيكا، IT جانە اۆتوماتتاندىرۋ باعىتتارىندا بىرقاتار زاماناۋي قۇرىلعىلار جەتكىزىلدى. بۇل جاستاردىڭ عىلىمي-زەرتتەۋ مەن ينجەنەرلىك ويلاۋ قابىلەتىن دامىتۋعا جول اشۋدا.
– قازىرگى تاڭدا كوللەدجدىڭ ماتەريالدىق-تەحنيكالىق بازاسى قارقىندى تۇردە جاڭارتىلىپ جاتىر. تەحنولوگيا كۇن سايىن دامىپ جاتقاندىقتان، ءبىز دە بۇل ۇدەرىسكە بەيىمدەلىپ، كوللەدجىمىزدى ۇنەمى جەتىلدىرۋ ۇستىندەمىز. مىسالى، جۋىردا عانا روبوتوتەحنيكا سەكتسياسىنا زاماناۋي قۇرىلعىلار جەتكىزىلىپ، ستۋدەنتتەردىڭ تاجىريبەلىك قابىلەتىن دامىتۋعا جاعداي جاسالدى. سونىمەن قاتار، ءبىز ءىرى كاسىپورىندارمەن – «قازفوسفات»، ندپز سەكىلدى الپاۋىتتارمەن مەموراندۋم جاساپ، ستۋدەنتتەرىمىزدى وندىرىستىك پراكتيكاعا باعىتتادىق، – دەدى كوللەدج ديرەكتورى اسحات كارتاكوۆ.
سونداي-اق، كوللەدج ستۋدەنتتەرى وسىنداي زاماناۋي تەحنيكالىق بازانىڭ ارقاسىندا ءتۇرلى جارىستارعا قاتىسىپ، جەتىستىككە جەتۋدە. ماسەلەن، WorldSkills چەمپيوناتىنىڭ ايماقتىق كەزەڭىندە ون توعىز قۇزىرەتتىلىك بويىنشا جارىس وتكەن. سونىڭ ىشىندە جامبىل پوليتەحنيكالىق جوعارى كوللەدجىنىڭ ون ءبىر ستۋدەنتى التىن جۇلدەگە يە بولعان. ولاردىڭ توعىزى ەندى رەسپۋبليكالىق كەزەڭدە وبلىس نامىسىن قورعاماق.
ايتا كەتۋ كەرەك، جامبىل پوليتەحنيكالىق جوعارى كوللەدجى «جاس مامان» جوباسىنا قاتىسىپ، ەلىمىز بويىنشا ىرىكتەلگەن 180 ۇزدىك كوللەدجدىڭ قاتارىنا ەنگەن. بۇل مارتەبە وقۋ ورنىنىڭ تەحنيكالىق مۇمكىندىكتەرى مەن ءبىلىم بەرۋ ساپاسىنىڭ جوعارى دەڭگەيدە ەكەنىن دالەلدەيدى.
كوللەدج تەك رەسپۋبليكالىق قانا ەمەس، حالىقارالىق سەرىكتەستىك باعىتىندا دا بەلسەندى جۇمىس جۇرگىزىپ كەلەدى. جۋىردا وقۋ ورنى قىتايدىڭ سيان قالاسىنداعى حيميالىق كوللەدجىمەن مەموراندۋمعا قول قويدى. بۇل كەلىسىمنىڭ نەگىزىندە قوس ديپلومدى ءبىلىم بەرۋ جۇيەسى ىسكە اسپاق. جوسپارعا سايكەس، ستۋدەنت ءۇش جىل بويى جامبىل پوليتەحنيكالىق جوعارى كوللەدجىندە وقىپ، سوڭعى وقۋ جىلىن قىتايدا جالعاستىرادى.
– بۇل پيلوتتىق جوبا ستۋدەنتتەر ءۇشىن تەگىن جۇزەگە اسادى. قىتايداعى وقۋ شىعىندارىن سەرىكتەس تاراپ تولىق قارجىلاندىرادى، ال قازاقستانداعى وقۋدى ءبىز ءوز ەسەبىمىزدەن قامتاماسىز ەتەمىز. قازىرگى تاڭدا قىتاي ينۆەستورلارى جامبىل وبلىسىنا بەلسەندى كەلىپ جاتقانىن ەسكەرسەك، بۇل باعدارلاما تۇلەكتەرىمىزگە مول مۇمكىندىك بەرەدى، – دەيدى كوللەدج ديرەكتورى.
قورىتىندىلاي كەلە، جامبىل پوليتەحنيكالىق جوعارى كوللەدجى — زاماناۋي ءبىلىم بەرۋ، كاسىبي تاجىريبە مەن حالىقارالىق سەرىكتەستىكتى ۇيلەستىرە وتىرىپ، ەڭبەك نارىعىنا قاجەتتى بىلىكتى ماماندار دايارلايتىن جەتەكشى وقۋ ورنى. ەلدەگى جۇمىسشى كادرلارعا دەگەن سۇرانىس ارتىپ وتىرعان كەزەڭدە مۇنداي كوللەدجدەردىڭ ءرولى بۇرىنعىدان دا ماڭىزدى.
