“اق جول” پارتياسى قاماۋدا وتىرعان 42 جاستىڭ ارىزىن باس پروكۋراتۋعا جولدادى. ولاردىڭ ءبىرازى بۇگىندە قاماۋدان بوساپ شىقتى.
ءماجىلىس دەپۋتاتتارى، “اق جول” پارتياسى توراعاسى ازات پەرۋاشەۆ پەن “اق جول” پارتياسى توراعاسى ورىنباسارى قازىبەك يسا
18 اقپاندا تارازداعى تەرگەۋ يزولياتورىندا تۇتقىندارمەن كەزدەستى.
ولار جاپپاي تارتىپسىزدىك جاساعان 68 ادام ۇستالىپ وتىرعان #158-1 تەرگەۋ يزولياتورىنا
(13-ءشى يزولياتور دەيدى ەل) باردى.
ازات پەرۋاشەۆ پەن قازىبەك يسا 6 قاپاستى (كامەرا), ارقايسىسىندا 10-12 ادام وتىر، ارالاپ كوردى. وندا ازاپتاۋ، ۇرىپ-سوعۋ جاعدايلارى، قاماۋدا ۇستاۋ جاعدايلارى، ولاردىڭ قۇقىقتارىنىڭ بۇزىلۋى بولعان-بولماعانى تۋرالى سۇرادى.
ۇستالعاندار قىسقا عانا “شاعىمدار جوق»، «ءبارى جاقسى»دەپ جاۋاپ بەرگەندىكتەن، دەپۋتاتتار جەكە سويلەسۋگە نيەت بىلدىرگەندەرگە ۋاقىتشا ۇستاۋ يزولياتورى قىزمەتكەرلەرىنىڭ قاتىسۋىنسىز، مەكەمە باسشىلىعى دايىنداعان باقىلاۋ كامەرالارىنسىز جەكە بولمەدە وڭاشا سويلەسۋدى ۇسىندى. مۇنداي تىلەكتى 14 ادام ايتىپ، دەپۋتاتتار ارقايسىسىن بولەك قابىلداپ، جان-جاقتى اڭگىمەلەسۋ بولدى. اڭگىمە 4 ساعاتقا سوزىلدى.
ۇستالعاندارمەن اڭگىمە بارىسىندا مىنا جاعدايلار انىقتالدى:
- ءبىر-ەكەۋىن قوسپاعاندا، ۇستالعانداردىڭ دەنى 18 بەن 24 جاس ارالىعىندا ەكەن.
- تۇتقىنعا الىنعانداردىڭ جارتىسىنان كوبى قاماۋ كەزىندە ولارعا قارسى كۇش قولدانىلعانىن ايتتى. ۇستالعانداردى ۋۇي-دا ۇستاعان العاشقى كۇندەرى ازاپتاۋ مەن ۇرىپ-سوعۋ تۋرالى ءۇش مالىمەت ايتىلدى. دەپۋتاتتارعا قاتىگەزدىگىمەن ەرەكشەلەنگەن ءۇش تەرگەۋشىنىڭ ناقتى اتى-ءجونى اتالدى، ولاردىڭ بىرەۋىن تەرگەۋ يزولياتورىنداعى قاماۋداعىلار جانە ولاردان بولەك كەڭسەدەگى قابىلداۋعا كەلگەن باسقا كۇدىكتىنىڭ اناسى دا اتاپ وتكەن بولاتىن.
– تەرگەۋ يزولياتورىنا تۇسكەننەن كەيىن ەشقانداي ازاپتاۋلار مەن ۇرىپ-سوعۋلار بولعان جوق – مۇنى قاماۋداعىلاردىڭ بارلىعى راستادى.
- ءۇش جاعدايدى قوسپاعاندا، قالعان ارىزدانۋشىلار قاماۋعا الۋدىڭ بەلگىلى ءبىر نەگىزدەرى بولعانىن مويىندايدى. ەڭ كوپ تارالعان نەگىزدەر - ۇرلىق جانە قارۋ ۇستاۋ. ۇستالعانداردىڭ ايتۋىنشا، تارتىپسىزدىكتەر كەزىندە جانە ودان كەيىن ءىىد عيماراتىنىڭ جانىنداعى ساياباقتا اۆتوماتتار، تاپانشالار، كارابيندەر جانە باسقا دا قارۋلار ەمىن-ەركىن شاشىلىپ جاتقان جانە سومكەلەرگە تولتىرىلىپ قويىلعان. ول جاقتان بىرەۋلەر ءبىر قوراپ وق، بىرەۋ 4 پۋلەمەت، بىرەۋ 4 اۆتومات، بىرەۋلەرى تاپانشالار العان. قيراتۋلاردىڭ، ورتەنىپ جاتقان اكىمدىك عيماراتى الدىندا سەلفي جاساپ، جەكە تەلەفونىنا ۆيدەو تۇسىرگەننىڭ ناتيجەسىندە ۇستالعان ادامدار دا بار ەكەن. بىرەۋ تاڭعى ساعات 4-تە دوسىمەن بىرگە ونسىز دا تالان-تاراجعا تۇسكەن اكىمدىككە بارىپ، ونداعى تەحنيكانى تالقانداسا، ەندى ءبىرى (ونىڭ ايتۋىنشا) اكىمدىكتىڭ ءمورىن كوشەدەن تاۋىپ، الىپ كەتكەن.
– جەكە اڭگىمەدە ۇستالعانداردىڭ بارلىعى دەرلىك جالپى كوڭىل-كۇيگە بوي الدىرىپ، «قىزىق بولعانى ءۇشىن شىقتىق»، «قىزىعۋشىلىقپەن باردىم» دەپ ايتتى.
– مەملەكەتتىك ادۆوكاتتاردىڭ ارەكەتسىزدىگى مەن ەنجارلىعىنا شاعىمدار كوپ، جەكە ادۆوكاتتاردى جۇمىسقا الۋعا قاراجات جوق. وسىعان بايلانىستى، مەملەكەتتىك قورعاۋشىنى اۋىستىرۋ تۋرالى وتىنىشتەر، سونداي-اق ەكى ءوتىنىش – ۇلتتىق ۇلاننىڭ قۇتقارىلعان ساربازىن كۋالىككە شاقىرۋ تۋرالى وتىنىشتەرى جازىلعان، ەكىنشى جاعدايدا قارۋدى ءوز ەركىمەن قايتارۋعا ۇندەۋلەر، اكىمدىك عيماراتىنا ءورت ءسوندىرۋشى ماشينە شاقىرعانى جانە تب. ايتىلعان تەلەفون قوڭىراۋلارىنىڭ دەتاليزاتسياسىن الۋعا كومەكتەسۋ تۋرالى ايتىلدى.
جەكە قابىلداۋعا جازىلعان تەرگەۋ يزولياتورىندا وتىرعان جاس جىگىتتەرگە ازات پەرۋاشەۆ قاتەلىكتتەرىن تۇسىندىرە وتىرىپ، ۇلكەن جىگەر بەردى. “الدارىڭدا ومىرلەرىڭ كۇتىپ تۇر، سوعان جەتۋ جولىندا جاقسىلىقتان ءۇمىت ۇزبەڭدەر! رۋحتارىڭدى تۇسىرمەي، قايرات كورسەتىپ، ءوز بولاشاقتارىڭدى جارقىن ەتۋ جولىندا ارەكەت جاساڭدار! ءبىزدى دە حاباردا ۇستاڭىزدار، كومەك قولىن سوزۋعا دايىنبىز!” - دەپ رۋحاني قۋات بەردى. قاماۋ قاپاسىندا وتىرعان جاس جىگىتتەر قابىلداۋلاردان جانارلارىندا ءۇمىت وتى پايدا بولىپ، ەڭسەلەرىن تىك ۇستاپ شىقتى.
ازات تۇرلىبەكۇلى بايلانىستى ۇزبەي، وزىنە نەمەسە قازىبەك جارىلقاسىنۇلىنا حات جازۋعا، تىم بولماسا شارتتى نە مەرزىمنەن بۇرىن (ۋدو) بوساتۋدى سۇراۋدى، بۇل دا جاعدايدى ايتارلىقتاي جەڭىلدەتۋى مۇمكىن ەكەنىن تىلگە تيەك ەتتى.
دەپۋتاتتاردىڭ ءوتىنىشى ناقتى كەپىلدىك بەرمەيتىنىن، سوڭعى شەشىمدى سوت شىعاراتىنىن جەتكىزدى. قانداي ۇكىم شىعارىلعان جاعدايدا دا، ادىلەتسىز دەپ ساناپ، كەلىسپەگەندەرگە تاباندىلىق تانىتىپ، اپەللياتسيالىق شاعىم تۇسىرۋگە شاقىردى.
- جالپى، وقيعا بارىسىندا ارانداپ قالعاندارعا ادامگەرشىلىك تانىتۋ (شىنايى ۇيىمداستىرۋشىلاردى جاۋاپقا تارتۋمەن قاتار) قوعامداعى بىرلىكتى ساقتاۋعا جانە جىككە ءبولىنۋ قاۋپىن ەڭسەرۋگە سەپتىگىن تيگىزەر ەدى دەپ ويلايمىن، - دەدى ا.پەرۋاشەۆ.
قازىبەك يسا:
جازا باسقان جاستارعا كەشىرىم جاسالۋى ءتيىس!
—تارازداعى تەرگەۋ يزولياتورىندا 6 قاپاستا (كامەرا) 68 ازامات وتىر ەكەن. بارىنە كىرىپ، كوزبە-كوز سويلەسىپ شىقتىق. قاي قاپاسقا كىرسەك تە، ءبارى ساپقا تۇرىپ، كەزەكشىسى بىردەن “ەشقانداي شاعىمىمىز جوق، ءبارى دۇرىس” دەپ باياندايدى.
“جازىقسىز وتىرمىن دەيتىندەر نەمەسە موينىما ىستەمەگەن قىلمىستى زورلىقپەن ىلۋدە، ازاپتاپ، ۇرىپ-سوقتى” دەيتىندەر بولسا، وڭاشا كابينەتتە جەكە قابىلداۋعا بولادى” دەپ ەدىك، 6 قاپاستان 14 جىگىت جازىلدى.
بۇل 14-ءىنىڭ دە ايتار ارىزىن جوعارىدا ايتىپ كەتتىك. ازاپتاۋ، ۇرىپ-سوعۋ بويىنشا 3 تەرگەۋشىنىڭ ۇستىنەن قىلمىستىق ءىس قوزعالعان.
جالپى، جاستار جازا باسقاندارىن مويىنداپ، ىستەگەن قاتەلىكتەرىنە وكىنەدى. قاپاسقا كىرگەندە بىزگە قۇتقارۋشىلار كەلگەندەي ۇلكەن ۇمىتپەن قارادى.
-جاپ-جاسپىز عوي، ءومىرىمىزدىڭ ءبارى الدىمىزدا. وقۋ ءبىتىرىپ، جۇمىسقا تۇرساق، وتباسى بولساق” دەپ ارمانداپ ءجۇر ەدىك. سوتتالىپ كەتسەك، ومىربايانىمىزعا قارا تاڭبا تۇسەدى. بۇگىن اكەلەرىمىز بەن انالارىمىزعا، ەرتەڭ بالالارىمىزعا نە ايتامىز؟!. سوندىقتان كەشىرىم جاساۋدى سۇرايمىز”-دەيدى جاس جىگىتتەر.
ءيا، جالىنداعان جاس شاعىندا ەل قامى ءۇشىن دەپ ەرەۋىلگە شىققاندارعا ىلەسىپ، اياعىندا ارانداتۋشىلاردىڭ بۇلىگىمەن قاندى قاسىرەتتە تۇرمەدەن ءبىر-اق شىققان ورىمدەي جاس قازاق جىگىتتەرىنە قاراپ جانىڭ اشيدى. مەملەكەت باسشىسى ق.توقاەۆ ايتقانداي، “اۋىرلاتاتىن ءمان-جاي بولماسا، جازالارىن جەڭىلدەتەتىن” كەز كەلىپ تۇر.
جازا باسقان، اداسقانىنا وكىنىپ، كەشىرىم سۇراعان جاستارىمىزدى كەشىرە الماساق، مەملەكەتتىگىمىز قايسى؟!.-دەيدى، اقىن، دەپۋتات قازىبەك يسا.
تۇستەن كەيىن دەپۋتاتتار باسقا دا ۇستالعانداردىڭ اتا-انالارى مەن ادۆوكاتتارىن قابىلداپ، ولاردىڭ ىستەرى بويىنشا دا باس پروكۋراتۋراعا وتىنىشتەر جولدادى.
قورىتىندىسىندا “اق جول” پارتياسى قاماۋدا وتىرعان 42 جاستىڭ ارىزىن باس پروكۋراتۋعا جولدادى. ولاردىڭ ءبىرازى بۇگىندە قاماۋدان بوساپ شىقتى.
